Спасувачите во Мексико водат трка со времето по разорниот земјотрес за да стасаат до преживеаните меѓу кои и едно 12 годишно девојче заробено во урнатините на училиштето, каде загинаа 20 деца, а 30 се исчезнати. Досега од урнатините низ целата земја спасени се 50 преживеани.
Претседателот Енрике Пења Нието изјави дека во главниот град загинале 102 лица, а во околните пет држави уште 135, додека 1.900 граѓани се повредени.
Спасувачите успеале да воспостават комуникација со девојче идентификувано како Фрида Софија која им рекла дека има уште две деца во близина, но не можела да каже дали се живи, пренесе телевизијата Телевиса чиикамери и репортери имаа специјален пристап до местото.
Спасувачите прво виделе рака во урнатините, и кога прашале дали има некој жив, таа мрднала со прстите, пренесува мексиканската телевизија.
Целосното име на девојчето не е објавено, но познато е дека нејзиното семејство чека во близина, откако телата на 21 дете и четворица возрасни веќе беа извлечени од под урнатините на училиштето.
Од Цивилната заштита истакнуваат дека со термален скенер е откриено дека под бетонските плочи има и други преживеани.
Официјални лица велат дека нема потреба да се користи тешка механизација се додека има знаци на живот под урнатините.
Градоначалникот на Мексико Сити Мигел Анхел Манцера изјави дека само во градот се урнале 52 згради.