Муарем Демиров, бездомникот за кој институциите си ја префрлаа одговорноста додека тој чекаше три пол месеци во Психијатриската болница за да биде опериран, од денеска ќе биде сместен во Геронтолошкиот завод во Скопје, потврдија за НОВА од Министерството за здравство. Од таму велат дека до ова решение дошле во договор со Министерство за труд и социјала.
„По извршениот телефонски разговор со стручно лице од ЈЗУ Геронтолошки завод „13 ноември“ Скопје добиена е информација дека лицето Муарем Демиров ќе биде сместен на ден 06.10 во нивната установа“, соопштија од Секторот за односи со јавност при Министерството за здравство.
Марем Демиров, минатата недела беше опериран во Градската општа болница „8 Септември“. На него му е ампутирана едната нога до под колено, а како што потврдија во болницата, тој ќе може да се движи без патерици бидејќи му е ставена протеза.
Сето ова се случува, откако НОВА објави дека институциите го заборавија бездомникот во Психијатриската болница во Бардовци иако ветија дека ќе биде опериран и згрижен на геријатрија.