Published: Saturday, October 7, 2017 20:43
Министерството за внатрешни работи соопшти дека двајца полицајци се суспендирани од работа поради прекумерна употреба на сила.
Настанот се случил на 28 септември кога двајцата полициски службеници Р.Б. и В.Н. од Полициската станица Карпош, при редовно извршување на мотопатролна служба, го затекнале лицето со иницијали А.Р. како краде во парфимерија во трговскиот центар Лептокарија во Скопје.
„При интервенцијата, полициските службеници несразмерно употребиле физичка сила врз сторителот, од што тој се здобил со тешки телесни повреди во пределот на лицето и телото. Со возило на Итната медицинска помош А.Р. е пренесен во Ургентен центар-Скопје, а поради сериозноста на повредите е задржан за понатамошно лекување“, соопшти МВР.
За настанот се известени Одделот за внатрешна контрола, криминалистички истраги и професионални стандарди во МВР и Основното јавно обвинителство Скопје. По издадените наредби на јавниот обвинител, преземени се мерки и дејствија за расчистување на случајот. Поради утврдено пречекорување на овластувањата, против полициските службеници е поведена постапка за утврдување на дисциплинска одговорност и тие се суспендирани од работните места до завршување на постапката.