Резултатите од анализите од водата земени од гостиварскиот водовод ќе бидат готови за 72 часа, што значи дека првите конкретни информации ќе излезат во понеделник или најдоцна во вторник, потврдија за НОВА во Институтот за јавно здравје.
Епидемиолошките анкети на тимовите кои од утринава се на терен не покажале ништо конкретно што би укажало што е причинител на стомачните тегоби на 450 луѓе кои во последните три дена побарале лекарска помош.
„ Примероците од пациентите се анализираат во болницата во Гостивар и досега не е изолирана бактерија. Анализите од водата направени во Центарот за јавно здравје во Гостивар, од пред некој ден не покажале ништо конкретно. Проширените анализи од водата се работат во Институтот за јавно здравје во Скопје и со резултати ќе излеземе најдоцна во вторник“, изјавија за НОВА во Институтот за јавно здравје.
Институтот за јавно здравје се вршат испитувања на бактериолошкиот и радиолошкиот состав на водата, физичко- хемискиот состав и дали водата евентуално е контаминирана.
Во понеделник екипи на Институтот ќе излезат повторно на терен да лоцираат дали има места во селата или градскиот водовод кои би можеле да бидат причина за оваа појава.
Како што веќе објави НОВА, 60 Гостиварци ноќеска побарале лекарска помош во болницата, со што бројот на оние со стомачни тегоби се искачи на 450 во последните три дена.
Од Министерството за здравство тврдат дека епидемиолошките и другите спроведени мерки покажале дека не постои поврзаност за конзумирање на храна од еден ист извор.
Утринава од 8 часот екипи на Државниот санитарен и здравствен инспекторат се на терен и прават увид на состојбата во гостиварската болница.