И покрај тоа што за време на викендот лидерите на Каталонија беа отпуштени од работа од страна на шпанската влада, тие утрово се појавиле на работа, пишуваат локалните медиуми.
Иако каталонскиот Парламент прогласи независност, официјалните претставници на сега веќе нелигитимната регионална власт дошле на своето работно место.
Шпанскиот премиер Мариано Рахој претходно најави дека нема да му дозволи на лидерот на Каталонија, Карлес Пучдемон да управува со регионот, но влезот утрово нему и на министрите им е дозволен за да си ги соберат своите работи од канцелариите.
„Продолжуваме со планирана агенда“, напиша Жозеп Рул, доскорашниот министер за земјиште и одржлив развој на Твитер, фотографирајќи се во канцеларијата.
Пучдемон пак, објави фотографија на Инстраграм од каталонскиот Парламент каде што напиша „Убав ден“.
Ова следува по вчерашните протести на стотици илјади Шпанци кои маршираа на улиците во Мадрид против независноста на Каталонија, барајќи казни за Пучдемон и неговите соработници.
Марширајќи со знамиња на Шпанија, околу 300.000 демонстранти, како што пишуваат медиумите, бараа апсење на Пучдемон и сепаратистите кои ја водеа битката за незавнисност.
„Во затвор“, „во затвор“, извикуваа тие.
Шпанската влада, фрустрирана од ситуацијата со Каталонија, во саботата почна да ја презема контролата над автономната зона, отпуштајќи ги од работа претседателот и неговите министри како и шефовите на полицијата, и сета моќ ја презеде во свои раце.
Пучдемон во кратко обраќање до јавноста побара жителите на Каталонија да се спротистават „демократски“.
Според шпанскиот весник „Ел Периодико“, министерот за внатрешни работи на Шпанија побарал од шпанската полиција да бидат симнати од ѕидовите сите портрети во институциите каде што го има ликот на Пучдемон.
Околу 140 каталонски владини претставници се отпуштени од работа, а нови избори се закажани за 21.декември за пополнување на каталонскиот Парламент.