“Карлес Пучдемонт денес дојде во белгиската полиција”, изјави Жил Дежемеп, портпарол на бриселското обвинтелство.
“Петте лица што ги бара Шпанија дојдоа сами во судската полиција во Брисел и беа лишени од слобода”, прецизираше портпаролот.
Петте лица, придружени од нивните адвокати, ќе бидат сослушани денес. Обвинтелството случајот ќе го прати на истражен судија како што предвидува процедурата.
Истражниот судија ќе одлучи дали треба да го активира европскиот налог за апсење во наредните 24 часа односно пред 9.17 минути во понеделник.
“Бевме во постојан контајт со адвокатите на петте лица и беше договорено тие да дојдат во федералната полиција. Тие тоа го сторија како што беше договорено”, додаде портпаролот.
Со Пучдемонт дојдоа Мериџел Серет, екс министер за земјоделство, Антони Комин, екс министер за здравство, Луис Пуч, екс министер за култура и Клара Понсати, екс министер за образование.
Според белгискиот закон одлуката за извршување на европскиот налог треба да биде донесена во рок од 60 дена по апсењето. Потоа има рок за жалби и целата процедура може да трае 3 месеци, потсети белгиското Министерство за правда.
Според Ан Вејенберг, претседателка на Институтот за европски студии на Бриселскиот слободен унверзитет, белгиските судски власти можат да одбијат да го предадат Пучдемонт на шпанските власти:
“Белгиските судски власти можат да одбијат да го предадат Пучдемонт доколку оценат дека има јасен и сериозен ризик дека неговите фундаментални права ќе бидат нарушени и доколку белгиските судски власти сметаат дека престапот за којшто Шпанија го бара не е престап во белгиското право”, вели таа за агенцијата АФП.
Според повеќе изјави на адвокати со кои разговарала агенцијата АФП, одбивањето да се предаде обвинетиот на државата што го бара се ретки.
Шпански судија ги обвини Пучдемонт и неговите министри за “бунт, непослушност и финансиски малверзации”. Но, бунтот и непослушноста не постојат во белгиската правна рамка па оттука “одлуката зависи од интерпретацијата на законот на белгискиот судија кој треба да се изјасни дали ќе го изврши европскиот налог”, додава гѓа Вејенберг.