Карлес Пучдемон од Белгија денес преку Твитер ги повика на единство сите про-независност партии во Каталонија и побара да се обединат за изборите на 21 декември.
“Дојде мигот за обединување на сите демократи. За Каталонија, за слобода на политичките затвореници и Републиката”, напиша тој на каталонски јазик.
Пучдемон, разрешениот каталонски претседател, вчера даде екслузивно интервју на белгискиот јавен сервис РТБФ каде што изјави дека ќе биде кандидат на овие избори, распишани од Мадрид. Шпанската влада го разреши Пучдемон и неговата влада и презеде контрола врз најбогатиот шпански регион откако на 27 октомври каталонскиот Парламент прогласи независност.
Во својот твит Пучдемонт дава линк кон петиција која бара креирање на “унитарна листа” на партиите што се залагаат за независност и која досега има околу 20.000 потписи.
Топката е во рацете на белгиската правда
Пучдемон и четворица негови министри се обвинети од шпанското обвинителство за “бунт, непослушност и финансиски малверзации” а вчера шпански суд издаде европски налог за апсење на Пучдемонт и министрите што се со него во Брисел.
Завчера осум други министри беа уапсени во Мадрид со истите обвиненија. Девети министер кој даде оставка пред прогласувањето независност, беше обвинет но ослободен со кауција.
Пучдемонт е член на Демократската европска каталонска партија (ПДеКАТ). Оваа партија е на власт во Каталонија долги години. Оваа партија и Републиканската левица на Каталонија (ЕРК) се обединети во коалицијата “Заедно за да” и се на власт од 2015 година.
Несогласувањата помеѓу коалиционите партнери зајакнаа во последните месеци па сега, според анкетите, ЕРК има поголем рејтинг од партијата на Пучдемонт.
Партиите имаат време во 7 ноември за да се изјаснат дали ќе прават коалиција.
Во меѓувреме, белгиското судство треба да се изјасни како ќе одговори на шпанскиот налог за апсење на Пучдемонт.
Белгискиот министер за правда Кун Геенс изјави дека белгиската извршна власт не игра никаква улога во процедурата за апсење и се се одвива преку контакти на правосудните органи.
За Ројтерс, федералниот обвинител изјави дека налогот за апсење ќе биде разгледан а потоа предаде на истражен судија денес или утре.
Пучдемонт: Шпанската правда е варварска
Во интервјуто на РТБФ, кое траеше речиси половина час, Пучдемонт изјави дека не бега од правдата и сака да се појави “пред вистинско судство (белгиско) а не пред шпанската правда” која тој ја опиша како “политизирана” и “исклучително варварска”.
Истовремено Пучдемонт испрати повик за “дијалог” којшто според него е “единственото решение” да се излезе од ќорсокакот.
“Потребна е политика, а тоа Рахој не го прави никогаш”, изјави Каталонецот обвинувајќи го шпанскиот премиер Мариано Рахој за маневри поради кои денес се во затвор осуммина каталонски министри.
“Тој ги злоупотреби обвинителот, полицијата, фирмите… Не е нормално ние да ризикуваме 30 години затвор затоа што постапувавме според мандат даден од гласачите”, рече тој.
Пучдемонт беше избран на слободни избори пред две години и тврди дека во последните години барал дијалог и преговори со Мадрид не секогаш одговорот бил негативен.
Каталонците продолжуваат со протести. За среда е закажан генерален штрајк а за 12 ноември голем протест како поддршка на разрешената влада. Истиот ден ќе има протест за поддршка и во Брисел.
Анкетите покажуваат дека се зголемува поддршката за независност на Каталонија кај гласачите.