Нормализиран е сообраќајот на патниот правец Прилеп-Градско кај мотел Дреново, што беше во прекин од десет часот претпладне поради штрајк на вработени во металуршкиот комбинат „ФЕНИ“, соопшти Автомото сојузот на Македонија (АМСМ).
Во тек на штрајкот сообраќајот беше во прекин во двете насоки.
Околу 850 работници на „Фени“ го блокираа магистралниот Градско-Прилеп со барање неколкуте банки доверители да се повлечат и компанијата да не оди во стечај.
Во присуство на полиција блокирани се возила од двете страни, а се пропуштаат итни случаеви како на пример луѓе со авионска карта, болнички упат и слично.
Градоначалникот Митко Јанчев, пратеникот Панчо Минов и претседателот на Синдикатот Ѓоре Палитов се во Скопје на средба со вицепремиерот Кочо Анѓушев.
Привремениот стечаен управник Мирослав Анастасиевски изјави дека Фени Индустри АД има добар бизнис потенцијал, а отворање на стечајна постапка во овој момент е единствен начин за зачувување на имотот, спречување на настанување на штети и изнаоѓање на најбрзо можно решение за рестартирање и ангажирање на вработените во одржување на технолошкиот минимум, со изнаоѓање на нов стратешки инвеститор и брз премин кон нормално функционирање.
– Во финална фаза е изготовката на Извештајот за спроведена претходна постапка кој ќе биде поднесен до Основниот Суд Велес. Од направените анализи се препознава компанија која е западната во тешка финансиска состојба како резултат на слабо менаџирање и лоши деловни одлуки, изјави Анастасиевски.