Европскиот и македонски ракометен првак, Вардар, понесе три статуетки со потпис „13 ноември“, награда што традиционално ја доделува Сојузот на спортови на град Скопје. За најдобар спортист во годината е прогласен капитенот, Стојанче Стоилов, признанието за најдобар тренер заврши во рацете на Раул Гонзалез, а вардарци беа неприкосновени и во категоријата најдобра екипа. „Црвено-црните“ во 2017 година ја завршуваат со пет трофеи – најпрестижниот го освоија во Лигата на шампиони на ЕХФ, ја покорија конкуренцијата во регионалната СЕХА лига и кон нив додадоа уште три од домашната сцена (првенство, Куп и Суперкуп).
Сојузот на спортови на град Скопје додели и три награди за животно дело што им беа врачени на пензионираниот спортски новинар и коментатор, Златко Калински, на Насе Кондовски и на Александар Атанасов.
Признанија во согласност со критериумите за доделување на наградата „13 ноември“ добија и Крсте Војнески, Назим Куртовиќ, Џелал Красиќ, Боро Илиев, Јован Бизимовски.