Рочиштето за „Поткуп“, во кој обвинет е премиерот Зоран Заев, што требаше да продолжи денеска во Кривичниот суд, е одложено за 25 декември 2017 година.
Судењето е одложено за да се почека одлуката на Апелацискиот суд на 27 ноември за тоа дали снимките од посебните истражни мерки објавени на Јутуб можат да бидат доказ во постапката.
Премиерот Зоран Заев во придружба на своите адвокати денеска се појави на закажаното рочиште.
-На 27-ми ќе се одржи јавна седница во Апелација, каде што ќе се разгледа нашата жалба, па поради тоа денешното рочиште се одложи, а наредното е закажано за 25-ти декември, изјави Заев.
Претходното рочиште, на 27 септември, беше одложено поради отсуство на судијката Дијана Груевска-Илиевска.
Судот воедно го одби барањето на одбраната снимките кои се доказ во постапката, а кои беа објавени на Јутјуб да не се користат во предметот. Решението дека овие снимки ќе бидат доказ во постапката им беше врачено на обвинетиот Заев и на неговите адвокати. Адвокатот Филип Медарски најави жалба на ова решение.
Заев во „Поткуп“ е обвинет дека во својство на градоначалник на Струмица, побарал поткуп од струмички бизнисмен Иван Николов, кој сега се води како оштетен во случајот, побарал поткуп од 163.924 евра, односно по 2 евра за еден метар квадратен градежно земјиште во Струмица, за кое Николов бил заинтересиран да го приватизира. Наводно, една половина од парите требало да бидат за Заев, а другата за изградба на црква во Струмица.
Нарачаните шамари за Жерновски
И Никола Груевски треба да се појави во суд за обвиненијата за поттикнување на насилството што се случи при протестите пред општина Центар во јуни 2013 година. Во предметот на СЈО „Насилство во Центар“, покрај Груевски, обвинети се уште 13 лица, меѓу кои и поранешниот министер за транспорт и врски Миле Јанакиески и пратеничката Даниела Рангелова.
Претходното рочиште на 28 септември беше одложено поради отсуство на двајца обвинети.
Обвинителката Фатиме Фетаи тогаш предупреди дека и по година и два месеци главната расправа не почнува и дека предметот ќе ни застари.
Обвинителот од СЈО Гаврил Бубевски побара да се суди секој ден.
Насилствата во општина Центар се случија во 2013 година кога група граѓани се собраа пред општината за да ја „одбранат“ изградбата на црквата „Свети Константин и Елена“. За овој случај беа објавени и прислушувани разговори во кои се слушаше како тогашниот премиер Груевски, нарачува шамари за градоначалникот на Центар, Андреј Жерновски.
За случајот со нарачаните шлаканици, СЈО поднесе обвинителен предлог на 15 септември минатата година.
Во меѓувреме, Апелација донесе одлука да ја уважи жалбата на Специјалното јавното обвинителство и прифати „бомбите“ што ги објавуваше опозицијата да можат да бидат доказен материјал за предметот поврзан со насилството во општина Центар.
Основниот суд Скопје 1 ги отфрли во декември 2016 година.
Во „бомбите“ што ги објавуваше премиерот Зоран Заев, како лидер на опозицијата, објавен беше разговор во кој тогашниот премиер Никола Груевски нарачува некој да му „врзе три-четири шамари“ на градоначалникот на Општина Центар, Андреј Жерновски.