Вкупно 90 амандмани се поднесени за Предлог-законот за употреба на јазиците до Комисијата за европски прашања во Собранието до завршувањето на рокот.
Најмногу 84 поднела опозициската ВМРО-ДПМНЕ, СДСМ четири и Беса два.
Седницата на Комисијата за европски прашања, на која ќе се разгледуваат амандманите, е закажана за утре во 15 часот, а треба да трае три дена.
И ВМРО-ДПМНЕ и СДСМ и Беса по завршувањето на општата расправа на предлог-текстот најавија амандмани.
Пратеничката група на СДСМ и коалицијата поднесоа четири амандмани на Предлог-законот за употреба на јазиците што ќе значат унапредување на правата на етничките заедници во земјата, изјави денеска координаторот на пратеничката група Томислав Тунтев. Амандманите, според него, имаат поддршка и од колицискиот партнер ДУИ.
– За нас е исклучително важно заеднички да дојдеме до законско решение кое навистина ќе биде во интерес на сите граѓани во оваа држава, истакна Тунтев.
Со амандманската интервенција се унапредува позицијата на помалите етнички заедници кои се наведени во преамбулата во Уставот, потенцираше Тунтев, што ќе овозможи и овие заедници да остваруваат одредени права предвидени во предложеното законско решение. Станува збор, како што појасни тој, за амандман на членот 1 на предлог-законот во кој освен албанскиот јазик СДСМ предлага да се набројат и јазиците на сите етнички заедници наведени во преамбулата на Уставот.
Исто така СДСМ поднесе амандман и за намалување на висината на казните што беа наменети за институциите што нема да го почитуваат законот.
– Според нашиот предлог казните од 4.000-5.000 евра се намалуваат на 1.000-2.000 евра. Потоа исто така ја допрецизираме регулативата при водењето на седниците во Собрание и во Влада, рече Тунтев.
Според него, овие амандмани на пратеничката група добиле поддршка и од коалицискиот партнер ДУИ, а целта е заедничко решение кое практично ќе биде применливо.
– Информирани сме од Владата дека постои заклучок и општа согласност Министерството за правда преку Министерството за надворешни работи да побара мислење од Венецијанската комисија за целиот текст на законот по неговото усвојување, како и за отворените прашања кои не се дел од овој закон, а веќе се доставени до Венецијанската комисија, рече координаторот на пратеничката група на СДСМ.
Потсети дека коалициските партнери јавно презедоа обврска дека ќе го почитуваат мислењето на Венецијанската комисија и во случај на забелешки дека ќе ги вградат во законот, што лани беше побарано и од еврокомесарот Јоханес Хан.
– Оттука процесот за подобрување и унапредување на законското решение не завршува со овие четири амандмани, туку и натаму ќе се работи на тоа да дојдеме до решение кое ќе биде квалитетно и практично применливо, рече Тунтев.
Пратениците од опозициската ВМРО-ДПМНЕ поднесоа 84 амандмани за Предлог-законот за употреба на јазиците. И тие, како и нивните колеги од владејачкото мнозинство, предлагаат дополнување на членот 1 од текстот со наведување на јазиците на сите етнички заедници односно копирање на уставната преамбула.
Исто така тие амандмански предлагаат намалување на казните предвидени во предлог-законот за институциите од 4.000-5.000 евра на 40-50 евра.
Со еден од амандманите се бара бришење на сите членови од предлог-законот.
ВМРО-ДПМНЕ преку амандманите предлага судските постапки да се водат според материјалните закони, а одлуките да бидат на македонски јазик и потоа да се преведуваат на јазикот на заедниците, во државните институции албанскиот јазик да се употребува само во средините каде што тие се над 20 отсто, а не на целата територија, упатството на лековите да биде на сите јазици…
Пратеникот Илија Димовски денеска повторно побара бришење на европското знаменце од Предлог-законот за употреба на јазиците, како и итно одржување на јавна расправа за законот. Но пратениците го одбија неговиот предлог.