Расказот „Трансакција“ на авторот под шифра „Мува“ е годинешниот добитник на наградата „Живко Чинго“, во рамки на конкурсот за најдобар расказ што традиционално веќе 25 години ја распишува Општина Охрид во знак на почит кон делото на познатиот писател од охридскиот крај.
Славе Ѓорѓо Димоски, претседателот на жири-комисијата што ги вреднуваше творбите од конкурсот појасни дека расказот е избран во конкуренција на 48 пристигнати трудови, од кои два воопшто не биле разгледувани поради непочитување на поставените критериуми на конкурсот, јавува МИА.
Во потесен избор за наградата влегле три труда, и тоа „Момини солзи“, „Парапанисал“ и „Трансакција“, од кои жири-комисијата во состав Славе Ѓорго Димоски, Ирена Бачиќ и Зоран Јакимоски едногласно реши единствената награда во износ од 30 илјади денари да ја додели токму на ракописот „Трансакција“.
– Расказот „Трансакција“ обработува современа, урбана тема, во која на некој начин сите ние сме заробени и можеме да се препознаеме. Двата лика во расказот се типови од нашето секојдневние и ги препознаваме на секој чекор и при секоја средба со нив. Јазикот на кој е пренесена приказната е лесно прифатлив, близок до поширока читателска публика така што придонесува содржината да се восприема со еден здив, изјави Димоски на денешната прес-конференција.
Инаку, поради големиот интерес за конкурсот, како и квалитетот на доспеаните трудови, жири-комисијата до општинската Комисија за култура ќе предложи во иднина да се доделуваат три награди, за да се избегне неправдата кон останатите раскази што по својот висок естетски квалитет, но и содржински, стилски и структурален аспект го заслужуваат високото признание.
Наградата на лауреатот ќе му биде врачена на културната манифестацијата „Вечер на Живко Чинго“ што секоја година на роденденот на познатиот наш прозаист и драмски писател 13 август се одржува во охридското село Велгошти, родното место на Чинго.