Томислав Лазаров е виновен за дело – насилство во случајот со нарачаните шамари во општина Центар, во кој првообвинет е поранешниот премиер и актуелен претседател на ВМРО-ДПМНЕ, Никола Груевски.
На Лазаров кој бил претседател на општинскиот комитет на ВМРО-ДПМНЕ кога се случија насилните протести пред општина Центар и кој призна вина му е определена алтернативна мерка -шест месеци условна казна ако во рок од две години не стори кривично дело.
Како олеснителна околност за Лазаров е земено тоа што тој ја признал вината и длабоко се покајал, признание дадено без притисок и без уцени, како и тоа што е млад човек и е татко на две малолетни деца.
По изрекувањето на пресудата, Лазаров во изјава за медиумите не сакаше да ја коментира одлуката на Кривичниот суд.
Повтори дека жали за стореното и дека повеќе нема да прави нови кривични дела.
Лазаров не сакаше да коментира како неговото признание и пресудата ќе влијаат за останатите обвинети во случајот „шамари во Центар“ со цел да не и наштети на постапката.
Лазаров е се уште актуелен советник во советот во општина Центар од ВМРО-ДПМНЕ, но не сакаше да каже дали стравува дека можеби ќе има притисоци или закани од своите сопартијци.
Пресудат е правосилна бидејќи и тој и СЈО е откажаа од правото на жалба.
Тој е четвртообвинет за случајот за насилство, дека го поттикнал и организирал дел од членството на ВМРО-ДПМНЕ на протест, со наводен мотив дека ќе се протестира поради рушењето на црквата „Св. Константин и Елена“, која беше во фаза на градба на бул. „Македонија“, иако тоа воопшто не било точка на дневниот ред на седницата.
Во предметот „насилство во Центар“ обвинети се и лидерот на ВМРО-ДПМНЕ и поранешен премиер Никола Груевски, поранешниот министер за транспорт и врски Миле Јанакиески, пратеничката Даниелa Рангелова и уште 11 други лица. Судењето за овој случај на СЈО треба да продолжи на 29 ноември.