-Истрагата за случајот „Странски служби“ ќе ја прошириме. Јас лично бев изненадена од снимките во медиумите, а секоја изјава е добредојдена, изјави денеска специјалната обвинителка Катица Јанева.
Таа одби да открие дали станува збор за фирма од Израел, од каде што била набавувана опремата, објаснувајќи дека станува збор за класифицирани информации.
Во случајот „Странски служби“, осомничени се помошник-министер и началник на оперативна техника на УБК во МВР за злоупотреба на службената положба и овластувањето.
Според истрагата, во 2014 година во октомври и ноември по барање на еден од осомничените, кој тогаш бил началник на Одделот за оперативна техника во УБК, странска компанија изготвила извештај во кој било наведено дека на подрачјето на град Скопје, со своја опрема детектирале нелегални активности поврзани со дупли базни станици.
Ваквиот извештај требало да ја потврди тезата на тогашниот државен врв дека масовното незаконско прислушување го извршиле странски служби. Интерес за овој извештај имала и странската компанија, рече Фетаи.
Во декември 2014 година, месец по изготвувањето на извештајот, компанијата надвор од законот за јавни набавки, преку дејствијата на двајцата осомничени, го добила тендерот за набавка на опрема за потребите на МВР.
Постапката по оваа јавна набавка е по иницијатива на вториот осомничен, началникот, кој побарал да се спроведе набавка, а второ осомничениот донел одлука и формирал комисија за спроведување на јавната набавка. За пет дена била средина целата работа.
Опремата била донесена во мај 2015 година и била инсталирана.
Јанева денеска рече и дека Специјалното јавно обвинителство се откажало од барањето за замрзнување на палатата на ВМРО-ДПМНЕ за да не влијае на политичката состојба.