Апелацискиот суд Скопје денеска одржа јавна седница на која ја разгледа жалбата на одбраната на премиерот и лидер на СДСМ Зоран Заев, која бара видео снимките од посебните истражни мерки да не бидат користени како доказ во судската постапка за случајот „Поткуп“. Советот по оваа жалба, како што најави, ќе се произнесе дополнително.
Претседателот на Советот, судијата Сафет Кадрии на почетокот на денешната седница образложи дека разгледувањето на жалбата било одложено на неопределено време поради тоа што претходниот судија известител за овој случај бил избран за судија на Врховен суд по што случајот паднал на друг судија кој, како што рече, барал изземање од случајот за потоа Советот да се состане во денешниот состав.
Судија известител за предметот, како што е објавено на веб-страницата на судот, е новоизбраната апелациона судијка Тања Милева, која е сопруга на членот на ДИК, Игор Милев, кој, пак, поднесе оставка на функцијата. Судијката поради непристрасно одлучување побарала да биде изземена од одлучување за случајот.
Адвокатите на Заев пред судот посочија дека доказите од ПИ-мерките не им биле приложени на увид, поради што и не можеле соодветно да ги разгледаат. Според нив, конкретниот доказ е спорен поради тоа што е прибавен со изнудување од агент-провокатор во деловен простор и за тоа немало судска наредба. Дополнително, според нив, е направен прекршок и со нивното објавување во медиумите од страна на службено лице кое имало пристап до истите, а со самото објавување, како што посочија, била прекршена и презумпцијата на невиност на обвинетиот.
Во обидот да ги убедат апелационите судии дека снимката на која се гледа како наводно премиерот Зоран Заев, бара поткуп, додека ја вршеше градоначалничката функција, неговите адвокати истакнаа дека снимката е направена со агент провокатор.
Тие од Апелацискиот суд бараат снимката која е обезбедена со употреба на посебни истражни мерки да се издвои од предметот „Поткуп“, бидејќи дел од неа веќе беше емитувана на голем број медиуми, а тоа не е дозволено бидејќи овие докази се тајни.
-Употребиле агент-провокатор, но наредба за тоа нема, рече адвокатот Јаким Наумов, потсетувајќи дека снимката беше јавно објавена, поради што на Заев му е нарушено правото на фер-судење.
Адвокатот Ване Андреев додаде дека агент-провокаторот на Заев му ѕвонел во ноќните часови и го провоцирал со прашања за да го намести.
Вишиот јавен обвинител Јове Цветановски жалбите на одбраната ги отфрли како неосновани и посочи дека доказот е законски прибавен и судот тоа го утврдил.
Заев во случајот „Поткуп“, како поранешен градоначалник на Општина Струмица, е осомничен за барање и за земање поткуп во висина од околу 160 илјади евра од струмичкиот бизнисмен Иван Николов-Сачевалиев, во врска со легализација на земјиште.