Медијаторот на ОН во спорот за името Метју Нимиц по посетата на Атина, денеска во Скопје ќе има средби со претседателот Ѓорѓе Иванов, премиерот Зоран Заев, со министерот за надворешни работи Никола Димитров, како и со претседателите на ВМРО-ДПМНЕ и на ДУИ, Христијан Мицкоски и Али Ахмети.
Официјална изјава за посетата и ефектите од разговорите во Скопје медијаторот Нимиц, според најавите од МНР, ќе даде по средбата со министерот за надворешни работи Никола Димитров.
Тој во земјава дојде вчера и по пристигнувањето само кусо порача дека „по Атина очекува добри разговори и во Скопје“.
– Имавме добри средби во Атина. Се надеваме дека ќе имаме добри средби и тука. Се радувам на средбите во Владата и со другите лидери во Скопје, изјави посредникот Нимиц по пристигнувањето во Скопје.
По средбата со министерот за надворешни работи на Грција Никос Коѕијас, Нимиц изјави дека постои можност и оти е време за носење одлуки. Тој не сакаше да ги открие неговите идеи и предлози, велејќи дека не е добра идеја да коментира што предложил. Посочи дека во медиумите протекле некои од идеите, но нагласи оти јавно засега не може да зборува за тоа.
И од македонската Влада, како што истакна вчера нејзиниот портпарол Миле Бошњаковски, сметаат дека сега е вистинското време да се изнајде решение и оти постои и политичка волја и градење на односи со Грција кои се на едно повисоко ниво од се што било досега во претходните години.
Во меѓувреме, шефот на грчката дипломатија Коѕијас, откри дека Грција кон средината на февруари ќе и достави на Македонија нацрт спогодба со четири точки – предлози за името, иредентизмот, меѓународни и регионални односи на Македонија и мерки за позитивна агенда.
За тоа дали македонската Влада била известена за планот на Грција, владиниот портпарол вчера наведе дека заемно течат сите работи.
– Разговорите се водат под медијаторство на Метју Нимиц во рамки на ООН. Во таа рамка се водат и директни средби помеѓу министерствата за надворешни работи, потоа се крена еден степен погоре на ниво на премиери. Разговорите, преговорите се водат така што заемно ги работиме сите работи, рече Бошњаковски.
Пред десетина дена од македонското МНР за Телма потврдија дека пговарачите за спорот околу името, Васко Наумовски и Адамантиос Василакис, веќе нема да се среќаваат со посредникот Метју Нимиц, а преговорите за името ќе ги водат делегации од МНР предводени од министрите за надворешни работи Никола Димитров и Никос Коѕијас. Во оваа фаза поинтензивно ќе комуницираат и директорите за Балкан во Министерствата, Александра Миовска од македонска и Софија Грамата од грчка страна. И двете дипломатки веќе биле присутни на последната рунда преговори во Њујорк и се добро упатени во преговарачкиот процес, велат истите извори.
И покрај создавањето позитивна клима за постигнување договор, во Атина за 4 февруари е закажан нов протест за името на Македонија.