Поранешниот премиер Никола Груевски, поранешниот вицепремиер Владимир Пешевски, поранешниот министер за транспорт и врски, Миле Јанакиески, и поранешниот директор на Агенцијата за државни патишта, Љупчо Георгиевски, денеска пред Судот се изјаснија како невини за обвинението на СЈО во случајот „Траекторија“.
По воведниот говор на СЈО за тоа какво кривично дело им се става на товар на обвинетите, Судот објави дека им ги одбива сите приговори на адвокатите на обвинетите.
Судот го одби барањето на одбраната 315 бомби во овој случај да не се користат како доказ, бидејќи според одбраната на обвинетите на поранешните функционери, прислушуваните разговори се менувани.
Судот дополнително го одби барањето на Груевски да се отфрли и вештачењето на СЈО.
Груевски, Пешевски, Јанакиески и Георгиевски се обвинети дека во втората половина на 2012 година и во текот на 2013 година, при изборот на „Синохидро“ како компанија која ќе ги изгради автопатите Миладиновци – Штип и Кичево – Охрид, противправно се стекнале со 155.117.256 евра.
Во случајот на СЈО, Груевски е обвинет за кривично дело „примање награда за противзаконско влијание“, додека Јанакиески, Пешевски и Георгиевски за „злоупотреба на службена должност“.