Последната порака од Русија дека присоединувањето на Македонија во НАТО ќе има негативни последици за регионалната безбедност и билатералните односи ја зголеми загриженоста во домашната и меѓународната јавност.
Британскиот амбасадор Чарлс Гарет во колумна за „Независен“ пишува дека настанот со поранешниот руски агент и неговата ќерка Сергеј и Јулија Скрипал, во Солзбери, Велика Британија, каде беа цел на првата агресивна употреба на нервен отров е само дел од серијата прекршувања на меѓународното право, по Крим, Источна Украина и Грузија, неуспешниот воен удар во Црна Гора и сајбер-нападите на германскиот Бундестаг, на данската влада и други. Но, Гарет предупредува дека ништо не е исклучено- ваков напад може да се случи и во Македонија:
„Изминатата недела, според официјално руско соопштение за медиуми, нивниот заменик-министер упати закана кон Македонија дека чекорот кон членство во НАТО може да има негативни последици за регионалната безбедност и за билатералните односи….
…Настаните во Солзбери покажуваат колку далеку е подготвена да оди Русија за да ги нападне оние што имаат различни цели и мислења…Овој инцидент се случи во мирен провинциски град во Британија, следен пат може да биде на македонска почва или во вашиот роден град, пишува Гарет.
Британскиот амбасадор во Макеоднија потенцира дека спорот на Британија не е со рускиот народ – чија храброст за време на Втората светска војна не е заборавена, туку со амбицијата на Кремљ да ја подели и да ја ослабе меѓународната заедница.
За Мирче Адамчевски, дологодишен дописник од Москва, заканите од Русија упатени кон Македонија покажуваат дека Русија не кренала раце од Балканот. Според него, Русите ќе се обидат да влијаат преку маргинални партии и во македонскиот но и во албанскиот блок.
„Заканите од Русија во овој момент се пукање во празно, бидејки во Македонија има подршка од 75 проценти за влез во ЕУ и НАТО, за разлика од Црна Гора каде што се обидоа да влијаат на референдумот бидејќи таму половина од Црногорците беа за НАТО, а половина беа против. Во Македонија, Русија може да се обиде да привлече некои маргиналци како Јанко Бачев и одредени групи во албанскиот блок вели Адамчевски.
Според него, треба да се очекува дека Русија ќе се обиде да го придобие разочараното населението доколку Македонија не влезе во НАТО.
Руското влијание деновиве е во фокусот на Балканот- овонеделната турнеја „Руски Балкан“ на моторџиите „Ноќни волци“ во Босна, отвори многу дилеми и во регионот. Босанските власти ја прогласија групата за закана за безбедноста и го забранија влезот на нивниот лидер.
Со наслов: „Дали Босна е нова Украина“Ал Џезеира пишува дека иако групата рекла дека има намера “да го истражува културното влијание на Руската империја на Балканот”, многумина се вознемирени дека групата има друга агенда. Властите се загрижени дека ноќните волци предизвикуваат антизападно расположение во насока на сепаратистичко движење меѓу Србите во земјата, пишува Ал Џезеира.
Руската амбасада во Босна ги отфрли сите идеи дека мото клубот претставува закана за безбедноста.”За жал, во оваа неоснована кампања, вклучени се и босанските власти, чија главна задача е да ја зајакнат безбедноста, а не да ја поткопаат”, се вели во изјавата на амбасадата во “Ал Џезира”.
Ал Џезеира потсетува и на извештајот објавен минатата недела од страна на Институтот за надворешни истражувања со седиште во Соединетите Американски Држави. ,,Со поддршката на сецесионистички сили во Босна, Русија се надева дека може да го оштети кредибилитетот на НАТО и да го ослабне трансатлантскиот сојуз “, се вели во извештајот, а како групи од витално значење за руските интереси кои работат под маската на регистрирани невладини организации ги набројуваа „Српска чест“, „Ноќни волци“ и Ветераните на Република Српска.