Претседателот на Кривичниот суд Иван Џолев верува дека во Кривичниот суд има луѓе кои можат да ја сменат сегашната перцепција кај граѓаните за судството и тоа конечно да биде препознаено како гарант за правдата и правичноста.
„Убеден сум дека Кривичниот суд поседува луѓе, ќе повторам луѓе со кредибилитет и интегритет, за кои верувам дека во иднина јавноста ќе ги етикетира со зборот недопирливи“ рече претседателот на Кривичниот суд Џолев.
Џолев кој зборуваше на отворањето на новата зграда на Кривичниот суд, исто така рече дека надворешниот изглед на новата зградата различно бил перцепиран – на некои им се допаѓал, на други не, но поважно е смета тој,Кривичниот суд да креира убавина одвнатре.
„Убавината доаѓа одвнатре, а не однадвор и новиот Кривичен суд убавината ќе ја креира одвнатре, а истата ке ја создадеме ние вработените во судот, судските служебеници и судиите кои треба да ја смениме сегашната перцепција за судот. Сите ние заедно да направиме граѓаните да го посочуваат судството како гарант на правото и правичноста, гарант дека постои правната држава,гарант за еднаквост на сите пред законите, дека на невините ќе им биде гарантирана слободата, а криминалот санкциониран“ рече Џолев.
Во Кривичниот суд се вработени 350 лица. Во новата зграда на Кривичниот суд има 25 судници од кои две се големи, 100 канцеларии, модерна техничка опрема,внатрешен и надворешен видео надѕор, просторија за препознавање, простории за адвокати и обвинители.
Парите беа обезбедени од Светската банка, а помал дел од буџетот. Зградата првично требаше да чини 8,3 милиони евра, а потоа со склучување на анекси сумата беше зголемена за уште 2,7 милиони евра.
Камен – темелник беше поставен во 2010 година.
Веќе в понеделник во големата судница треба да се одржи првото рочиште за „Титаник“, во кој обвинетите се товарат за злосторничко здружување, злоупотреба на средствата за финансирање на изборната кампања и повреда на избирачкото право.
Инаку, „Титаник“ е првиот случај за кој СЈО поведе истрага во февруари 2016 година, а воедно е и најобемниот предмет, во кој покрај Груевски првообвинети се и екс министрите за транспорт и врски и за внатрешни работи, Миле Јанакиески и Гордана Јанкулоска, пратеникот Илија Димовски, поранешниот шеф на кабинет на Груевски, Мартин Протуѓер и екс генералниот секретар на Владата, Кирил Божиновски.
