Фосилни остатоци од изумрен вид на слон, чија старост се проценува на околу осум милиони години, се пронајдени во близина на селото Долни Дисан, Неготинско, соопштија денеска од Природонаучниот музеј на Македонија и Министерството за култура.
Како што информираат оттаму, станува збор за уникатно палеонтолошко откритие, а во тек се активности за колекционирање и конзервирање на пронајдените фосилни остатоци.
Тие биле откриени при теренска работа во текот на минатата година, а ископувањето на фосилните остатоци почнало на 20 април, годинава. Во него учествуваат палеонтолошки екипи на Природонаучниот музеј на Македонија и Природонаучниот музеј во Софија.
Според експертите, станува збор за фосилни остатоци од изумрен вид на слон (Choerolophodon pantelici), чија старост прелиминарно се проценува на околу осум милиони години.
„Фосилните остатоци беа откриени при заедничката теренска работа кај село Долни Дисан во 2017 година. Досега откриените коски укажуваат дека се работи за зачуван значаен дел од скелетот на слонот. Според мислењето на стручниот тим, се работи за наод со големо научно значење. Фосилни остатоци од овој вид на слон се најдени на повеќе локалитети во Македонија и ширум Евроазија, но комплетен скелет од ова животно досега не и е познат на науката. Ова го прави наодот уникатен во светски рамки, затоа што ќе одговори на повеќе прашања за изгледот и начинот на живот на овој предок на денешните слонови“, велат од Природонаучниот музеј на Македонија.
Со поддршка на Министерството за култура, преку програмата за музејска дејност, стручен тим од Природонаучниот музеј на Македонија раководен од м-р Биљана Гаревска, заедно со стручна помош од палеонтолози од Природонаучниот музеј од Софија предводени од д-р Николај Спасов, во наредните деновите ќе ги колекционираат ископаните остатоци.
„Се надеваме дека во блиска иднина фосилните коски ќе бидат конзервирани и претставени на македонската и меѓународната јавност, преку соодветно изложување во просториите на Музејот“, велат оттаму.
По својата старост (видот живеел пред 8 до 7 милиони години), овој вид слон е постар од мамутите (5 милиони – 4500 години). Населувал суви тревести живеалишта еквивалентни на денешните африкански савани. Живеел задно со предци на денешните жирафи, сабјести тигри, примати и други изумрени видови од периодот на миоцен.
