Реализацијата на Планот 3-6-9 е задоволителна. Од вкупно 130 активности исполнети се 78, односно 60 отсто, седум активности се делумно исполнети, 14 се неисполнети, додека 30 се немерливи, покажуваат последните наоди за реформската агенда од Планот 3-6-9 на Владата што денеска ги претстави Институтот за демократија „Социетас цивилис – Скопје“, „ИДСЦС“ во соработка со Фондацијата „Конрад Аденауер“.
Проектниот координатор при „ИДСЦС“ Зоран Нечев посочи дека е потребно да се забави со носењето реформи и да се насочи кон нивна соодветна имплементација.
„Заклучокот од нашата анализа е дека Планот задоволително ги следи препораките на Прибе, а забележлива е ниска усогласеност со клучниот стратешки документ кој ги вклучува усогласувањето на националното законодавство со европското“, изјави Нечев.
Посочи дека статистички најголем процент од неисполнетите активности припаѓаат на системските реформски закони во делот на правосудството за чие усвојување е потребна поддршка од опозицијата.
Вицепремиерот за евроинтеграции Бујар Османи рече дека Планот 3-6-9 ја постигнал суштината и ја вратил земјата цврсто на евроатлантската патека.
„Имам дилеми во однос на статистичкото мерење на Планот поради разликите во мерките и нивната тежина. Имате различна методологија во мерењата од нашата, според која ние имаме 94 отсто реализација. Сепак, најважно е дека земјата е стабилизирана“, рече Османи.
Тој нагласи дека Владата е подготвена Планот да го издигне на надпартиско ниво.
Францускиот амбасадор Кристијан Тимоние рече дека Планот 3-6-9 на краток рок не излегол од шини, но имало забавување, за кое верува дека се должи на политичката култура на обвинувања.
„Политичкиот систем не функционира добро, опозицијата се повлече од Собранието и се носеа забрзано закони. Во една модерна демократија опозицијата не треба да биде надвор. Амандманите не треба да се гледаат како средство за саботирање и треба да се прифатат и разгледуваат“, рече Тимоние.
Лукаш Холуб од Делегацијата на ЕУ изрази надеж дека ова ќе биде последната препорака од ЕУ за почеток на преговори.
„Не се работи за влез во ЕУ, вие веќе сте во Европа. Потребна е промена на начинот како се прават работите и тоа е суштината. Не се работи за закони, туку нивната имплементација“, рече Холуб.
Ова е трет Извештај за реализацијата на владинот План 3-6-9 изработен од Институтот за демократија „Социетас цивилис – Скопје“, „ИДСЦС“ во соработка со Фондацијата „Конрад Аденауер“.