Откако беше прочитано обвинението за случајот „Монструм“, рочиштето продолжи со давање искази на тројца од петмината обвинети. Третообвинетиот Агим Исмаиловиќ даваше контроверзни одговори за тоа што правел на денот на убиството. Прво рече дека бил на работа во интернет-кафе, потоа дека извршувал верски обреди или дека можеби бил и дома.
По неговите различни одговори за тоа каде се наоѓал на денот на петкратното убиство, Фетаи посочи и дека во претходната судска постапка, освен овие три одговори кажал дека местел канализација. Каде и со кого и колку дена работел и поставувал канализација, Агим Исмаиловиќ на денешното рочиште не знаеше точно да одговори пред судот. Агим е брат на второобвинетиот Африм Исмаиловиќ кој заедно со првообвинетиот Алил Демири е во бегство.
На прашањето, каде е брат му Африм, тој рече дека се наоѓа во Приштина во Косово и косовската полиција ја знае неговата адреса. Кажа дека се слушнале со него откако во декември лани беше укината пресудата и тие беа пуштени на слобода. На ова реагираше одбраната, зошто обвинителката поставува прашања за обвинети лица за кои има потерница и кои ги бара македонската полција.
-Контактирам, мојот брат живее и работи во Приштина, адресата не ја знам, ја знае косовската полиција, прашајте ја неа, рече Исмаиловиќ.
Во текот на распитот, Агим Исмаиловиќ се колнеше дека не го извршил убиството.
-Јас се колнам дека не сум го направил тоа и не сум виновен, рече Исмаиловиќ.
По паузата, судењето продолжува со сослушување на останатите обвинети Хаки Азири, Фејзи Азири и Сами Љута.
Во судницата се присутни обвинетите Агим Исмаиловиќ, Хаки Азири, Фејзи Азири и Сами Љута, како и роднини на убиените деца. На рочиштето не се присутни прво и второобвинетиот Алил Демири и Африм Исмаиловиќ, кои се недостапни за судот.
„Монструм“ е вратен на повторно судење, откако СЈО го презеде, а Врховниот суд претходно ги укина пресудите на првостепениот и второстепениот суд.
Масакрот кај Смилковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.
За петкратното убиство беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ и Езим и Хаки Азири и Сами Љута.
Врховниот суд во декември лани ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. За судот се уште недостапни се Алил Демири и Африм Исмаиловиќ по кои се распишани меѓународни потерници