Денеска во Кривичниот суд продолжи доказната постапка за случајот „Монструм“. Сведочеше Ахмет Беќир кому му се слоши и интревенираше Брзата помош.
Судијата Огнен Ставрев даде пауза и побара од присутните да ја напуштат салата.
Претходно, сведокот Беќир неколкупати се пожали дека е стар човек и дека не може да се сети што точно се случувало на 12 април 2012 година. Тој беше предупреден и од судијата Ставрев и од обвинителката Фатиме Фетаи дека мора да ја зборува вистината.
Обвинителката Фатиме Фетаи го праша сведокот Беќир што е точно – дали тоа што го зборувал пред истражниот судија во 2012 година или тоа што го зборува денес на ова рочиште. По ова, Беќир се сети дека на 12 април 2012 година видел човек со автоматска пушка кој нему и на тројцата другари со кои ловел риби им ја опцул мајката и им се заканил дека ќе ги убие ако не се тргнат од местото. Исто така, Беќир денеска кажа дека тој и тројцата негови другари дента на 12 април 2012 отишле на Смилковското еезеро меѓу 9 и 10 часот наутро, но пред истражниот судија пред 6 години кажал дека отишле да ловат риби околу 16 часот.
Контрадикторен беше и исказот на Беќир дека не може да се сети како изгледал човекот што им се заканувал дека ќе ги убие, но точно знаеше да каже дека во раката имал автоматска пушка.
Тој денеска изјави дека на 12 април слушнал еден истрел, а во истрагата пред 6 години сведочел дека слушнал два истрели.
Во моментов возилото на Брзата помош се уште е пред Кривичниот суд од каде треба да биде изнесен сведокот Беќир.