Претседателот на ВМРО ДПМНЕ Христијан Мицкоски вечерва на прес конференција изјави дека неговата партија нема да го промени ставот дека е против промена на Уставот, за промена на уставното име.
Тој побара од Заев веднаш да им го достави договорот, за што како што рече ги откажал сите негови претходно планирани обврски надвор до државата.
-Тежок ден за Република Македонија. Зоран Заев се обиде поразот да го покажува како победа. Она што е стекнато како право, правото на јазик и идентитет се покажува како извојувана победа во преговорите со нашиот јужен сосед, тоа е загарантирано многу порано, јасно кажано и напишано во ОН, рече Мицкоски.
Тој истакна дека референдум ќе има и на него тој како Мискоски ќе гласа против.
Според него ова е прифаќање на сите грчки позици и затоа за нив не е ништо повеќе од таканаречен договор.
-Тоа е прифаќање на промена на Уставот, за внарешна и надворешна употреба на името, поради што тој е договор на Зоран Заев за капитулација, рече Мицкоски додавајќи:
-Доколку Заев се обидува шверцерски капитуалацијата да ја протне низ собраниска процедура, кажувам дека референдум ке има и тој ќе биде задолжителен, а не консултативен, рече Мицкоски.
Тој исто така рече дека договорот е резултат на неспособноста на Заев и на дипломатијата што ја водеше во изминатиот период и го обвини дека покажал нестабилност и промена на личните ставови, што според Мицкоски е недостоинствено за премиер на една држава.
-Јас ќе опстојам на принципите. Оној кој отстапува од принципите покажува дека воопшто немал принципи и треба да ја каже цената за таквите компромиси, таа цена со Заев е преголема и прескапа за Република Македонија. Ние сме за членство во ЕУ и НАТО, ќе настојуваме и придонесуваме за тоа, но истото мора да биде по сработеното, а не по предавствата и капитуалциите. Со ваквите договори Македонија губи и не смее да продолжи да губи. Верувам во граѓаните и нивниот капацитет, ќе продолжам силно да верувам и работам за Република Македонија, вели Мицкоски.
Според Мицкоски со договорот се прави непроценлива штета и државата се турка во амбис.
-Заев се обидува да покаже вештачка среќа, се гледа од далеку дека ова е пораз, тоа се чувствува кај граѓаните, потиштеност и пораз. Целосниот процес се водеше во тајност, опозициската ВМРО-ДПМНЕ не беше вклучена во преговорите. Единствено што се случи денеска е телефонскиот разговор со Заев веднаш по неговиот разговор со неговиот колега Ципрас. Прифатени се сите грчки позиции и не може да се прифати договорот. Ако за Заев е прифатливо промена на Уставот, тогаш тоа е договор на Заев за капитулација, рече Мицкоски.
Мицкоски повторно спомена дека неговата партија како најголема опозициска партија не била вкучена во преговорите и дека Заев ги монополизирал преговорите. Единствена информација добил денеска во телефонскиот разговор, кога од Заев бил информиран веднаш по постигнатиот договор со Ципрас.