Група европратеници, кои се воедно и известувачи и претседаели на делегации на земјите од Западен Балкан упатија отворено писмо до шефовите на држави и влади од ЕУ со кое бараат на состанокот на Европскиот совет на 28 и 29 јуни, да донесат „храбра одлука“ за отворање на патот за успешна интеграција на земјите од Западен Балкан во ЕУ.
Тања Фајон, Кнут Флекенштајн, Едуард Кукан, Моника Маковеј, Дејвид Мартин, Алојз Петерле, Тонино Пицула, Иво Вајгл, Чарлс Танок, Кристијан Дан Преда и Игор Солтес во писмото посебно го истакнуваат Преспанскиот договор, кој како што велат отвора исклучителна можност за Европа: Да придонесе во спроведувањето на овој договор и да донесе уште една земја од Западен Балкан на патот кон Унијата.
-Потпишан на брегот на Преспанското Езеро пред само неколку дена, договорот меѓу владите на Грција и Поранешната југословенска Република Македонија за решавање на нивните разлики во врска со спорот со името отвора исклучителна можност за Европа: Да придонесе во спроведувањето на овој договор и да донесе уште една земја од Западен Балкан на патот кон Унијата и, со тоа, да го посее семето на мирот и просперитетот за цела Југоисточна Европа.
Овој избор за живот во мир и просперитет, регулиран со владеењето на правото и со ефективни демократски институции, ги обединува граѓаните од сите шест нации во Западен Балкан: Албанија, Босна и Херцеговина, Косово, Северна Македонија, Црна Гора и Србија.
Генерација на млади Албанци, Бошњаци и Херцеговци, Косовари, Северни Македонци, Црногорци и Срби израснаа со депресивната перспектива дека билатералните спорови, горчливите сеќавања на војни за кои немаат удел и злонамерно злоупотребени верзии на историјата бесконечно ќе ја дефинираат нивната врска со своите европски соседи и ќе ги спречат нивните нации да ги градат своите општества и демократски институции. Со добра волја, потребната решителност и јасен политички став, овој мрачен изглед наскоро би можел да биде од минато.
Затоа ги повикуваме шефовите на држави и влади на Европската унија да ја сфатат оваа можност што се пружа еднаш во животот. На луѓето од Западен Балкан им е потребен јасен знак дека Унијата ги поддржува нивните напори за изградба на современи држави, со силни и независни институции, одржливи економии и солидарни општества. Неколку регионални и глобални сили имаат политички и финансиски интерес во спречувањето на европските амбиции на сите шест партнери од Западен Балкан. Ова не смее да се случи. Силите на несогласувања не смеат да преовладаат, се вели во писмото.
Тие ги повикуваат европските лидери да ја покажат својата јасна посветеност на европската перспектива на целиот регион, согласувајќи се на отворањето на пристапните преговори со Скопје и Тирана на претстојниот Европски совет на 28 и 29 јуни, во тековните преговори за пристапување со Црна Гора и Србија да се отворат нови поглавја, да се одобри визна либерализација за Косово, а реформските напори на Босна и Херцеговина да бидат наградени, во зависност од исходот и последиците од изборите на 7 октомври.
-Иднината на Западен Балкан лежи во Европската унија, во владеењето на правото, либералната демократија, социјалната правда и иновативната енергичност на отвореното општество. Темелните и амбициозни преговори на патот кон членството во ЕУ нудат најсилна можна гаранција дека граѓаните од шесте земји во оваа не толку далечна иднина ќе ги уживаат овие бенефиции. Европа не смее да ги разочара, велат европатениците во писмото до лидерите на ЕУ.