Единаесет години по еден од најдобрите концерти кои било кога се одржале кај нас, легендарниот музички револуционер Ману Чао се враќа на истата локација, Скопското лизгалиште, каде на 21 септември ќе ја има третата средба со македонската публика со која негува посебна љубов и поврзаност.
По спектакуларниот почеток на турнејата во Будимпешта со концерт пред повеќе од 10.000 посетители, и распродадените концерти во Љубљана, Загреб, Белград и Софија, конечно пред нас е и концертот во Скопје, за кој сѐ укажува дека на Скопското лизгалиште нѐ очекува уште еден музички спектакл како финале на оваа балканска турнеја.
Ова очекување дополнително го потврдува и фактот дека останати се уште мал број влезниците за концертот во Скопје, кој предизвика интерес и кај публиката од соседните земји.
Бескомпромисниот уметник, пејач и гитарист, во придружба на гитаристот Маџид Фахем, Филип Тебул на тапани и Гамбит на бас гитара, на публиката и најавува концерт кој ќе трае повеќе од два часа. Ману Чао со составот Ла Вентура, планира да ги развесели своите фанови со неверојатната и единствена мешавина на музички стилови, од рок и панк, предку ска до реге музика.
Покрај легендарните хитови „Bongo Bong“, „La Vida Tombola“, „Me Gustas Tu“, „Mala Vida“, „Clandestino“ и останатите, Ману Чао на овој концерт ќе изведе и песни кои до сега не се објавени.
Пред концертот на Ману Чао Ла Вентура, на 21 септември публиката ќе има можност да ужива и во енергичните настапи на два одлични бендови, најперспективниот македонски даб/реге/хардкор бенд „Конкоринг Лајон“ и балкан-џипси панк составот „Баилдса“. „Баилдса“ и „Конкоринг Лајон“, по овој повод подготвија и видео поздрав, најавувајќи го својот настап преку обработка на еден од хитовите на Ману Чао, песната „Mr Bobby“.