Владините измени на Изборниот законик со кој се менува начинот на кандидирање и на избор на членови на ДИК, веќе се ставени на собраниската седница како 12 точка на Дневниот ред и ќе се гласаат по итна постапка.
Опозицијата гласаше „против“ и ја повика власта да покаже политички разум и да ги повлече измените.
„Како сакате да учествуваме на референдумот кога ги менувате правилата пред гласање“, изјавија дел од пратениците од ВМРО ДПМНЕ.
Во собраниската полемика, власта ја прозва опозицијата дека тактизирала предолго време и веќе се прегазени сите рокови за избор на комисијата која треба да го спроведе референдумот.
„Од 2008 година, вие од ВМРО ДПМНЕ тврдите дека сте за референдум. Со блокирањето на ДИК, оневозможувате граѓаните да се изјаснат на рферендумот, ние тоа мора да им го овозможиме“, изјавија пратениците на СДСМ.
Потегот на Владата да поднесе по скратена постапка измени на Изборниот Законик е последен обид да се истурка изборот на членови на ДИК, доколку опозицијата и на утрешната лидерска средба закажана за 18 часот, инсистира на договорот од март.
ВМРО ДПМНЕ бара составот на ДИК да се избира откако ќе бидат донесени Законот за финансирање на партиите и измените на Законот за Влада за формирање на „ пржинска влада“ како дел од пакетот закони што биле усогласени со власта, по што опозицијата се согласи да се врати во Парламентот и да го прекине бојкотот. Не е исклучено, измените да бидат и повлечени, доколку се постигне договор на лидерската средба. Ова го најави и пратеникот од СДСМ Томислав Тунтев кој рече дека „измените ќе се повлечат ако има договор со опозицијата на утрешната средба, како и портпаролот на Владата Миле Бошњаковски на прес конференцијата претходно.
Од опозицијата нема најави дека може да се повлечат од нивните барања и да се даде предност на формирањето на ДИК.
„Ова е лош ден за демокатијата. Да предлагате измени на Изборен законик во ваква скандалозна постапка без учество на опозицијата е политичко неразумно и авторитативно однесување“ рече Драган Данев од ВМРО ДПМНЕ.
Претседателот на Собранието Талат Џафери кажа дека иако ВМРО ДПМНЕ презеле обврска дека нема да го блокираат изборот на ДИК,го правеле спротивното.
„Собранието не може да биде заробеник на било која партија. Со тактизирањето околу изборот на ДИК се доведува во прашање правото на граѓаните да се изјасната на референдум“, рече Џафери.
Што се менува во Изборниот законик
Измените се однесуваат на неколку ставови во Членот 27 од Изборниот законик и тоа:
-Став 3 – целосно се брише
-Во Став 4 се брише „на прелог на листа“
-Во Став 5 се брише зборот „двотретинско“.
НОВА ТВ имаше увид во предложените измени.
Освен што се предлага да се смени потребното мнозинство за избор на членови на ДИК, во измените Владата предлага и нов начин на кандидирање на членовите на ДИК.
Според предлогот во Изборниот законик се брише точката која предвидува собраниската Комисија за именување да подготви предлог-листа на кандидати а кандидатите да се предлагаат директно на собраниска седница.
Во предлог-измените пишува дека на собраниска седница опозицијата треба да предложи претседател и двајца членови на ДИК а власта потпретседател и тројца членови на Државната изборна комисија.
Со измените се предлага изборот на членови на Државната изборна комисија (ДИК) да се избира со просто мнозинство од 61 пратеник, а не со двотретинско мнозинство како што беше до сега.
Измените на Изборниот Законик стигнуваат откако ВМРО-ДПМНЕ го услови изборот на членови на ДИК со усвојување на Законот за финансирање на политичките партии како и со формирање на техничка Влада.
Поради ова формирањето на ДИК за сега е блокирано. Рокот за избор на членови на оваа Комисија истече пред две недели.
Членовите на ДИК си дадоа оставки во декември лани, по што власта и опозицијата со консензус изгласаа измени на Изборниот Законик.
ВМРО ДПМНЕ побара, а власта се согласи претседателот на ДИК да биде предложен од опозицијата. Беше објавен и оглас на кој се пријавија 40 кандидати но не се состана комисијата за избори и именувања со која претседава Илија Димовски зашто власта и опозицијата не се договорија околу Пржинската Влада.
За референдумот да се одржи кон крајот на септември, одлуката за негово одржување, Собранието треба да ја донесе до крајот од месецов, а претходно треба да се избере и Државната изборна комиија.
Формирањето на ДИК е клучно затоа што ДИК е надлежната институција која што треба да го спроведе референдумот.