Полицијата во Грција уапси четворица кои се осомничени дека подметнале еден од пожарите. Уапсените се на возраст од 22 до 26 години и се криеле од пожарот во една напуштена куќа.
Врховниот суд ги истражува причините за трагедијата, како и индициите дека државната помош стигнала доцна, и дека за вакви ситуации градовите немале планови за евакуација, како и тоа дека голем дел од уништените куќи биле дивоградби покрај брегот.
Бројот на загинатите во пожарите во регионот Атика се искачи на 80, откако еден 84-годишен маж им подлегна на повредите во атинската болница, каде што беше пренесен со сериозни изгореници.

И понатаму е непознат бројот на исчезнати лица.
– Досега добивме десетици повици за регистрирање на исчезнати лица. Со оглед на тоа дека во тек е процесот на идентификација на телата на загинатите, можно е меѓу исчезнатите да се вклучени и овие 79 лица, чии тела се пронајдени, како и лица кои се вратија кај нивните најблиски, без да ги информираат надлежните власти, рече портпаролката на грчката противпожарна служба, Ставрула Малири и додаде дека и денеска продолжува потрагата по исчезнати во опожарените населби Вуѕа, Мати и Рафина.
Паралелно, таа уште еднаш порача дека граѓаните чии блиски се исчезнати треба да пријават на бројот на противпожарната служба за да се одреди точниот број на лица на кои им се губи секаква трага.
Околу 200 инженери од Министерството за инфраструктура и транспорт на Грција, веќе започнаа со регистрација на штетите на објекти во погодените населби од пожарот.
Од регистрирани 720 куќи, 211 биле одбележани со црвена боја, односно дека штетата е голема, 234 добиле жолта, а 275 зелена боја, односно дека можат сопствениците да се вратат дома.
Паралелно во соработка со префектурата Атика, од улиците биле отстранети над 125 изгорени и уништени автомобили.

Грчкиот Центарот за контрола и превенција на болести информира дека негови и психолози на противпожарна служба им стојат на располагање за пружање психолошка поддршка на лицата кои претпеа материјални штети во пожарот или загубија членови на семејствата.
Центарот соопшти дека во погодените населби ќе испрати специјални мобилни единици од епидемиолози, лекари и медицински сестри за контрола и заштита на јавното здравје, а на располагање на лицата од овие подрачја им стојат психолози.
Грчкиот информативен портал „Ин“, во текстот посветен на процесот на идентификација на телата на загинатите, пишува дека и противпожарната служба на Грција го ставила на располагање психолозите за поддршка на луѓето што ги изгубиле нивните најблиски во пожарите.
Во Грција денеска е ден на жалост и знамињата се на половина копје за трагедијата на Атика.
На Синтагма во Атина се донира крв, се испраќа храна, лекови, а одобрен е дополнителен пакет од 20 милиони евра за најпогодените подрачја.




