Бројот на жртви во пожарите во областа Атика се искачи на 76, додека пак повредени се 187 лица, од кои 23 деца, соопшти портпаролката на грчката противпожарна служба.

Вкупниот број на повредени е 164 возрасни лица и 23 деца. Истрагата за пронаоѓање на исчезнатите ја води група од 130 луѓе од армијата и противпожарната единица кои патролираат пеш во областите Вуца, Мати и Рафина, истакна портпаролката на грчката противпожарна служба, Ставрула Малири, на прес конференцијата одржана попладнево во Атина и додаде дека добиле десетици повици за исчезнати лица.

Таа упати повик до граѓаните чии блиски се исчезнати да пријават на бројот на противпожарната служба, за да се одреди точниот број на лица на кои им се губи секаква трага.

Со оглед на тоа дека голем дел од пронајдените тела се јагленосани, тешко оди идентификацијата на жртвите, а со тоа не се знае дали лицата по кои се трага се живи или не.

Спасувачката акција продолжува со проверка на домовите и становите зафатени од пожарот, за евентуално да се откријат загинати или исчезнати граѓани.

Во Грција, постои стравување дека бројот на жртвите ќе достигне троцифрен број.

Спортската сала во населбата Рафина, од вчера е адаптирана, со кревети, душеци и основни неопходни продукти на сите оние што во пожарот ги изгубија нивните домови.

Волонтери, организации, граѓани, грчките општини, веќе започнаа хуманитарни акции за помош на настраданите.

Паралелно, грчката влада соопшти вонредни економски мерки за настраданите во пожарите.

Министерството за финансии одвои 20 милиони евра за потребите на општините и граѓаните што беа директно погодени, ќе се отвори специјална банкарска сметка од министерството за донации, додека пак за настраданите предвидени се даночни олеснувања. Откако ќе се регистрираат материјалните штети, грчката влада ќе објави дополнителни пакет мерки за поддршка на семејствата на жртвите и на оние чии домови беа уништени.

Европската комисија го активираше механизмот за цивилна заштита во кризни ситуаци, а помош на Грција и упатија голем број земји, меѓу кои Македонија, Шпанија, Франција, Шпанија, Израел, Бугарија, Турција, Италија, Португалија и Холандија.

Од вчера, со одлука на грчката влада, како што соопшти премиерот Алексис Ципрас, во Грција е прогласена тридневна национална жалост.

Се претпоставува дека оваа трагедија е предизвикана од најмалку 15 пожари во оваа област, за кои не е позната причината, но нивното ширење било помогнато од ветрот.