Потпретседателот на Соединетите Американски Држави, Мајкл Пенс испрати писмо до Премиерот Зоран Заев во кое ја истакнува неговата благодарност за покажаното лидерство во постигнувањето на Договорот и нагласува дека 90 отсто од оние што гласаа на референдумот го одобрија Договорот од Преспа, и со тоа ја потврдија огромната посветеност европската иднина на Република Македонија.
„Соединетите Американски Држави ја споделуваат вашата посветеност за поголема сигурност и стабилност на регионот. Бидете уверени во мојата континуирана поддршка во овој важен момент за вашата земја“, пишува Пенс кој очекува натамошно јакнење на пријателството меѓу двете земји.
Во писмото, Пенс пишува и дека му преставувало чест да се сретне со премиерот Заев на 20 септември во Белата куќа во Вашингтон и дека ја цени можноста што ја имале заеднички да разговараат за спроведувањето на историскиот договор од Преспа со Република Грција.