Маж на возраст од 68 години е меѓу тројцата загинати во автобуската несреќа кај Лесковац во Србија. Македонското министерство за надворешни работи добило потврда дека се загинати и две жени но не се идентификувани.
Четворица патници се со тешки телесни повреди и се во животна опасност. Тие се префрлени во Клиничкиот центар во Ниш. Полесно се повредени 28 патници и тие се надвор од животна опасност. 14 ќе бидат пуштени од болница и за нив МНР ќе обезбеди сместување. Возачот и совозачот не се повредени, но не смеат да даваат изјави за медиуми. Едниот од возачите бил од Битола додека вториот од Прилеп.
Несреќата се случи утрово во 1:40 минути кај Лесковац, кога автобусот излетал од патот пробивајќи ја заштитната ограда и се превртел кај клучката Печењевци во близина на Лесковац.
„ Автобусот беше превртен, а три лица беа без знаци на живот. Медицинските екипи од Лесковац кои први стигнаа на местото на несреќата даваа помош на повредените, но имаше и патници кои беа заглавени во автобусот и тие беа извлечени со помош на противпожарните спасувачки екипи на МВР. Еден од патниците кој беше прв згрижен имаше симптоми на фрактура на черепот. Најтешко повредените беа пренесени во болницата во Ниш“ рече доктор кој учествувал во спасувањето на патниците.
Патниците изјавиле дека спиеле кога се случила несреќата и не биле свесни што се случило.
Автобусот е сопственост на струшката компанија Еуробус и вчера во 19 часот тргнал од Битола за Виена.
Сопственикот на „Еуробус“ Џитан Истрефи за МИА изјави дека автобусот, произведен во 2006 година, редовно ги поминувал техничките прегледи.
– Испративме друг автобус и наши вработени на местото на несреќата за да ја видат состојбата и да се преземе се што е потребно. Нашите автобуси редовно се сервисираат, кај нас нема грешки, изјави Истрефи, не изнесувајќи други детали за несреќата.
Министерот за здравство Филипче, генералниот секретар на Владата Рашкоски и претставник на амбасадата на Македонија во Белград се упатиле кон местото на несреќата.
Причините за несреќата се уште се утврдуваат. Во Лесковац врнело дожд, а по полноќ паѓал и снег и се претпоставува дека влажниот коловоз може да е причина за несреќата.