Поранешниот директор на Управата за безбедност и контраразузнавање, Владимир Атанасовски доби нови 30 дена притвор, потврдија од Кривичниот суд во Скопје.
Обвинителството за организиран криминал и корупција побарало притвор врз три основи: опасност од бегство, влијание врз сведоци и опасност од повторување на кривичното дело.
Атанасовски е осомничен за кривичното дело „здружување заради непријателска дејност” за настаните од 27 април.
Атанасовски беше уапсен на почетокот од декември, по сведочењето на браќата Стефан и Михаил Младеновски, кои давајќи ја својата одбрана како обвинети за „27 април“ го посочија како еден од организаторите на упадот во Собранието.
Првиот притвор на Атанасовски му беше одреден на 5 декември лани, откако ноќта беше приведен и однесен на распит во Кривичниот суд.
– Постои основано сомнение дека лицето сторило кривично дело Здружување заради непријателска дејност од чл. 324 ст.1 од Кривичниот законик. Надлежен обвинител до судија на претходна постапка достави Предлог за определување на мерка притвор, соопшти тогаш ЈОРМ.
Владимир Атанасовски беше назначен за директор на УБК во септември 2016 година по оставката на Сашо Мијалков.
Атанасовски сведочеше во Судот за настаните од 27 април, на барање на обвинетиот Александар Василесвки – Нинџа. Тој не можеше да се сети каде бил дента на 27 април и го упати Судот да го праша неговото обезбедување. Не се сеќаваше ниту дали на 27 април се видел со обвинетиот Никола Митрески Кољо.