Граѓанските здруженија „Тврдокорни“ и „Македонија блокира“ кои денеска од пладне одржуваат протест пред Собранието против уставните измени, најавија радикални мерки, доколку бидат изгласани измените. Тие побараа нивни претставници да влезат во Парламентот на разговори со пратениците и го повикаа претседателот Ѓорге Иванов да излезе со нив на протести.
-Ако успееме да го спречиме ние ќе славиме. Но ако се промени Уставот, ќе се промени се во Македонија. Нема да биде Македонија. Ние години наназад се бориме да го сочуваме македонското и ќе го сочуваме, рече Драган Угриновки од Македонија блокира.
Тој рече дека нивната битка ќе биде прво со демократски методи, а потоа и со радикални. Тој не сакаше да ги каже кои се тие радикални марки, туку само спомена граѓанска непослушност.
Од движењето „Македонија блокира“ побараа нивни претставници да влезат во Парламентот за да разговараат со пратениците, како би им ги изложиле своите ставови против промена на уставното име.
Тие чекаат одговор од собраниското обезбедување, дали ќе им биде дозволено на тројца или четворица демонстранти да влезат на средба со пратениците.
-Започнува денот Д. Ова е првата фаза. Ако ова помине, има и втора фаза. Оваа марионетска власт не сака да го почитува народот. Дали треба да и дозволиме на оваа збирштина да избрише се што е македонско. Терористи, педери седат внатре. Ние сме решени да останеме свои на своето – рече претседателот на „Единствена Македонија“, Јанко Бачев.
Бачев рече дека нивен претставник е на средба со Иванов.
Улицата пред Собранието е целосно блокирана, а се забележува и зголемено присуство на полицијата.
Протестот, како што велат организаторите, ќе трае се додека не заврши пленарната седница, ќе вршат притисок и нема да дозволат да бидат усвоени уставните измени.