Потребата да се донесе нов Закон за спречување на корупцијата и судирот на интереси со кој на новите антикорупционери им се гарантира независност во изборот и добиваат нови надлежности како што се контрола во финансирањето на политичките партии и во изборните кампањи, беше едногалсно изгласана во Собранието.
Министерката за правда Рената Дескоска која го предлага Законот со европско знаменце побара да се гласа по скратена постапка.
„ Ја знам дека има пратеници кои се плашат од храбрите решенија во Законот, но на следните претседателски, а можеби и парламентарни избори треба да имаме антикорупциска комисија која ќе ги следи регуларноста на изборните кампањи и трошењето на буџетските пари во тој период“ рече Дескоска.
Новиот Закон по трет пат се враќа во Собранието. Прв пат беше повлечен по барање на европските експерти кои бараа допрецизирање на одредбите за поголема независност на новите антикорупционери а втор пат го повлече власта за да ги избегне амндманите што ги поднесе ВМРО ДПМНЕ.
Од ВМРО ДПМНЕ велат дека не сакаат да го блокираат донесувањето на Законот, но инситираат да се прифатат нивните амандмани со кои бараат да има усогласеност на Законот со други важечки закони кои се однесуваат на ревизија на финансирањето на кампањите и политичките партии. Од партијата додаваат дека финансирањето на партиите е задача на Заводот за ревизија и не може да биде во надлежност и на антикорупциската.
Спречување на корупција во политиката
Со новиот Закон за спречување на корупцијата и судирот на интереси, Државната изборна комисија ќе има право да почне постапка за испитување на финансирањето на политичката партија и доколку утврди незаконитости да побара одговорност пред надлежните органи. Ваквата иницијатива ќе може да ја покрене по сопствена иницијатива или по иницијатива од било кое правно или физичко лице. Партиите се должни да ги доставата до ДКСК сите податоци што ќе ги побара.
За поголема контрола врз финанисирањето на партиите треба да придонесе и новиот Закон за јавен пристап до информациите со кои трошењето на партиските пари ќе стане јавен податок. Исто така и во Законот за финансирање на политичките партии кој беше изгласан минатата година, а со кој се зголемија буџетските пари за финансирање на партиите од 0,06 проценти од државниот буџет на 0,15 проценти, е утврдено дека секој граѓанин има право на еднаков пристап во увидот на финансирањето на политичката партија.
Од ВМРО ДПМНЕ велат дека доколку не бидат прифатени нивните амндмани антикорупциската комисија ќе се претвори во институција која ќе спроведува политички реваншизам.
Опозициската партија бара само учесниците во кампањите да можат да поднесат пријави едни против други ако имаат индиции за нерегуларно финансирање, но не и трети лица.
„Според она што е поднесено, физички лица да можат да пријавуваат нерегуларно финансирање на политички партии и политички кампањи. Тоа значи можност за заглавување на работата на антикорупциската, со тоа што илјада пријави да стигнат, организирано, знаеме дека тоа се во можност да го направат, и да се закочи работата на Антикорупциската комисија“, рече партискиот портпарол Наум Стоилковски на прес-конференција, во одговор на новинарско прашање.
Финансирањето на партиите и на изборните кампањи досега беше задача на Државната изборна комисија и на Државниот ревизор но и покрај сомневањата за злоупотреби на буџетски пари во изборни кампањи и сомнително финанисирање на партиите не беше покрената истрага.
СЈО пред два месеци, во ноември поднесе обвинение за „Талир“ за незаконско финансирање на ВМРО ДПМНЕ и Обвинителството го прифати. По барање на СЈО, замрзнат е целокупниот имот на партијата. Во Талир се обвинети повеќе поранешни функционери на партијата на чело со екс лидерот Никола Груевски за финансирање на партијата од незаконски и анонимни извори и за малверзации при изградбата на новото партиското седиште.
Антикорупциската комисија не функционира повеќе од 10 месеци по оставките на членовите на Комисијата поради наводите за ненаменско трошење на буџетски средства од нивна страна.
Јавното обвинителство на Република Македонија објави дека скопското Основното јавно обвинителство оформи предмет по допрен глас за трошењето на буџетски средства од страна на членовите на ДКСК.
Џафери: Ќе се скратат роковите за избор на првиот состав на антикорупционерите
Претседателот на Собранието Талат Џафери рече дека роковите кои се предвидени во предлог – законот се долги и дека е оставена можност овие рокови да се скратат за да се избере антикорупциска комисија пред претседателските избори.
„ Роковите се прилично долги во предлог – законот, но оставена е можност во преодните одредби со одлука на Претседателот на Собранието првата објава да биде во негова надлежност и да може со Правилник да се уреди скратувањето на роковите за избор на првиот мандатен состав. Се надевам дека ќе имаме можност тоа да го направиме, ако во соодветен рок го донесеме новиот Закон за спречување на корупција“ рече Џафери.