СЈО поднесе две обвиненија за „Талир“ – за незаконско финансирање на  ВМРО-ДПМНЕ и за незаконска изградба на новото седиште на ВМРО-ДПМНЕ. Првото обвиние за незаконското финансирање ги опфаќа екс лидерот Никола Груевски, други пет поранешни функционери и самата партија како правно лице. Груевски се товари дека во периодот од 2009 до 2015 година обезбедил пари за партијата од анонимни и незаконски извори.

Во оваа шема му помагале Кирил Божиновски и Миле Јанакиевски кои вршеле притисок врз газди на фирми кои имале склучено договори за јавни набавки со државни органи, јавни претпријатија или единици на локална самоуправа да исплатат готовина на ВМРО ДПМНЕ , како против услуга за добиените јавни набавки.

На овој начин, партијата според обвинението „заработила“ повеќе од 4. 600 000 евра.

За да се прикрие потеклото на парите, обвинетите Никола Груевски и Кирил Божиновски, во периодот од 2011 до 2015 година и обвинетите Миле Јанакиевски и Елизабета Чингароска, организирале парите  да бидат уплатени на жиро сметката на ВМРО-ДПМНЕ преку готовински уплати на ПП10 уплатници во кои биле внесени невистинити податоци дека уплатата ја вршат лицата наведени во уплатниците, иако тоа не било случај.

По ова обвинетите  Димовски,  Чингароска, Ристоски и Јанакиески, како овластени потписници на сметката на партијата иако знаеле дека парите потекнуваат од кривично дело, истите ги пуштиле во натамошен оптек и со нив се купувал недвижен партиски имот.

СЈО бара притвор за Груевски и  мерки за препазливост за  обвинетата Елизабета Чингаровска – еднаш неделно во Основен суд, привремено одземање на патната исправа за преминување на државната граница и забрана за издавање на нова.

За второто обвинение – за изградба на седиштето на ВМРО-ДПМНЕ обвинети се  Никола Груевски и Кирил Божиновски, кои како што пишува во обвинението ја искористиле „состојбата на зависност во која се наоѓало правното лице ДГ Бетон АД Скопје во однос на ВМРО-ДПМНЕ“ Во периодот од 2011 и 2012 година,  75% од приходите на Бетон биле од државни органи, единици на локална самоуправа или јавни претпријатија раководени од функционери на политичката партија ВМРО-ДПМНЕ. Бетон го изградил седиштето на ВМРО-ДПМНЕ кое имало инвестициска вредност од речиси 7 милиони евра и  уплатило на жиро сметката на партијата износ од  2.155.668 евра. Вложувањата на ВМРО-ДПМНЕ изнесувале само  815.323 евра. На ваков начин ВМРО-ДПМНЕ добиле  8.246.576 евра.

По барање на СЈО Судот го замрзна имотот на ВМРО ДПМНЕ – партијата има забрана да продава или да стави под хипотека  68 партиски имоти како и  седиштето на партијата. Целиот овој имот бил стекнат во период од две години од 2013 до крајот на 2015 година и СЈО се сомнева дека може да е стекнат на незаконски начин.

Од СЈО објаснуваат дека се надлежни за поведување на обвиненијата за Талир, затоа што се работи за предмет што е преземен од  од Основно јавно обвинителство Скопје .