Египетскиот шеик Ахмед ал Тајеб предизвика контроверзии поради изјава дека полигамијата е „неправда” кон жените иако не повика на забрана на ваквата практика.
„Тие кои велат дека бракот мора да биде полигамен, грешат. Ние треба да ги читаме стиховите (Куранот) во целост, рече шеикот Ал Тајеб.
Големиот имам на џамијата „Ал Азхар“ меѓу сунитите се смета за врховен авторитет во толкување на исламските закони. Ал Тајеб вели дека моногамијата е правило, а полигамијата е ограничена на исклучоци. Според него, полигамијата во исламот е ограничена и бара „праведност”, а „ако нема праведност, забрането е да имате повеќе од една жена”.
Тој додаде дека практиката на земање повеќе жени произлегува од „недостаток на разбирање на Куранот и традицијата на Пророкот”, дека е често „неправедна кон жените и децата” и повика на промена на начинот со кој се пристапува за женските прашања.
„Жените претставуваат половина од општеството. Ако не водиме грижа за нив, тоа е како да одиме само на една нога, рече Ал Тајеб.
Ваквите негови коментари, што во петокот беа емитувани директно на египетската државна телевизија, предизвикаа жестока дебата на социјалните мрежи. Некои го поддржаа големиот имам и се заложија за целосна забрана на полигамијата додека други, претежно од ултраконзервативното движење на салафистите, ги повикаа мажите да имаат повеќе од една жена.
Египетскиот Национален совет за жени ги поздрави изјавите на шеикот Ал Тајеб.
„Исламот ги почитува жените, ги третира праведно и им дава многу права што претходно не постоеја“, вели претседателката на Советот, Маја Морси.
Исламот им дозволува на мажите да имаат најмногу четири жени, но под услов да ги третираат подеднакво. Иако полигамијата е дозволена во повеќето муслимански земји, освен во Тунис и Турција, оваа практика, сепак, не е вообичаена.