Уште еден Македонец починал откако почнал да се лекува кај надрилекарот од Србија Мирољуб Петровиќ. Српскиот весник „Блиц“ во денешното издание објавува сведоштво на вујкото на 42 годишниот Ристо Крстевски, Александар Илиевски кој тврди дека неговиот внук Ристо починал по едногодишно лекување со тинктурите на Петровиќ, за кои платил цело богатство, па дури се задолжил и со кредити.
Според Илиевски, кој, како што пишува Блиц е од околината на Прилеп, на неговиот внук Ристо во ноември 2016 му бил дијагностициран карцином на грлото и веднаш се обратил кај Петровиќ. Уште веднаш од Петровиќ добил совет: „Слушајте ме мене, не ги слушајте дебилните лекари“.
Ристо се лекувал цела година со тинкрутите на Петровиќ, а 12 дена бил и во центарот на Петровиќ кај Лесковац. За лекувањето Илиевски вели дека зеле и кредит, продавале имот, бидејќи месечно тинктурите чинеле 160 евра, а престојот во центарот 600 евра.
Но неговата состојба на крајот се влошила и тој починал на 17 декември 2017.
За комуникацијата со Петровиќ, Илиевски за Блиц вели дека таа била исклуливо меѓу неговиот внук и надрилекарот. Но кога состојбата му се влошила, Петровиќ веќе не му одговарал на пораките.
По смртта, Илиевски се обратил до Петровиќ, од кого добил одговор дека се неблагодарни и им порачал да не го бараат повеќе.
-Кога му се јавив, ми рече само дека не ме познава и да не го барам повеќе. Подготвен сум сето ова да го кажам во полиција. Тој шарлатан е многу опасен, а млади луѓе многу го слушаат Мирољуб и веруваат во неговите зборови, вели Илиевски за Блиц.
Случајот со Ристо Крстевски е само еден од многуте за кои весникот Блиц подолго време пишува, а се поврзани со надрилекартвото на Мирољуб Петровиќ.
Во Јавното обвинителство во Лесковац се води предистражна постапка против Петровиќ со која треба да се утврди дали се занимавал со надрилекарство.
– Тоа го правиме заради утврдување на постоење на основа за сомневање дека Мирољуб Петровиќ сторил кривично дело „тешко дело против здравјето на луѓето“ по член 259, став 2 и член 254 од Кривичниот законик“, се вели во одговорот од Обвинителството.
Еден од нив е и случајот на 31 годишниот Славчо Петров чија сестра за НОВА ја раскажа голготата низ која поминал нејзиниот брат, кој имал тумор на мозокот и исто така поради шарлатанството на Петровиќ ја изгуби битката со ракот.
Биљана Јовановиќ апелира до сите оние кои слушнале за Петровиќ, кои се соочуваат со тешка болест и имале намера да заминат кај него, да не одат и предупредува дека се работи за човек кој заработува на маката на тешко болните.