„Вознемирена сум и жалам за непропорционалното безбедносно присуство на сила кое ги спречи мирните протести на новинарите и граѓаните во одбрана токму на слободата на изразување“, вели за НОВА, амбасадорката на Холандија во Македонија, Мариет Шурман.
Таа надополнува дека, тешка е да се разбере потребата за масивна демонстрација на сила, како што е тешка да се разбере долгата казна без преседан за Кежаровски.
„Со оглед на немирите и стравот што оваа казна ги предизвика кај граѓаните, очекувам пресудата напишана да се објави во најкус можен рок. Судовите зборуваат преку нивните пресуди, и само напишаните пресуди можат да служат како уверување дека правдата е донесена неселективно, на независен начин, преку соодветен процес, и со должно почитување на темелната вредност на слободата на изразувањето“, потенцира Шурман.
Нејзината изјава доаѓа откако новинарите, новинарските здруженија и граѓаните вчера беа спречени од претставниците на полицијата да влезат во Музејот на македонската борба.
Како што претходно најави Иницијативниот одбор за ослободување на Кежаровски, протестот беше организиран во знак на солидарност и поддршка на новинарот Томислав Кежаровски кој „доби“ четири и пол години затворска казна за текст напишан во 2008 година. Пресуда на која реагираа многубројни домашни и странски организации, меѓу кои и ОН, ОБСЕ, и Меѓународен ПЕН.