Основачот на Викиликс, Џулјан Асанж, е задржан од лондонската полиција по барање за екстрадиција од властите во САД.
Информацијата штотуку се појави на интернет-страницата на Скотланд јард, при што се истакнува дека судот ќе закаже сослушување „колку што е можно побргу“.
Министерството за правда на САД, според медиумите, минатата година подигнало обвиненија против Асанж, но тие материјали наводно биле заштитени под графата „строго доверливо“.
Американските обвинители денеска соопштија дека поднеле обвинение против Асанж, кој заедно со поранешниот американски разузнавачки аналитичар Челси Менинг, ковал заговор во обид да пристапи до доверливи информации во компјутерот на американската влада во 2010 година.
Асанж се соочува со максимум пет години затвор, се наведува во соопштението на американското Министерство за правда.
Основачот на „Викиликс” е обвинет дека му помагал на Менинг да ја пробие лозинката, со помош на која успеал да пристапи до податоци во компјутерите на Пентагон.
Адвокатот на Асанж претходно изјави дека неговиот клиент планира да се бори против обвинувањата на САД.
Асанж е на пат кон Судот во Вестминстер, кој ќе одлучи за неговата екстрадиција во САД.
Британската полиција денеска го уапси Асанж откако ја напуштил зградата на Амбасадата на Еквадор во Лондон, каде престојуваше изминативе седум години.
Во соопштението на британската полиција се наведува дека 47-годишниот Асанж бил уапсен врз основа на налог на Судот во Вестминстер издаден на 29 јуни 2012 година, затоа што не се јавил на суд во предвидениот термин.
Апсењето на Асанж следи откако властите на Еквадор соопштија дека решиле да му го укинат азилот.
Во случај на негова екстрадиција во САД, Асанж може да добие долга затворска казна за шпионажа. Самиот тој многупати досега има изјавено дека во САД би можело да му биде изречена смртна казна.
Претседателот на Еквадор, Ленин Морено изјави дека го укинал азилот на Асанж поради неговите постојани прекршувања на меѓународните конвенции, додавајќи дека Британија нема да го испорача Асанж во земја каде има смртна казна.
-Велика Британија гарантираше дека основачот на Викиликс Џулијан Асанж нема да биде испорачан на земја каде законот предвидува смртна казна, изјави денеска претседателот на Еквадор Ленин Морено по апсењето на Асанж во еквадорската амбасада во Лондон.
– Согласно нашата силна посветеност на човековите права и меѓународниот закон, побарав од Велика Британија да гарантира дека Асанж нема да биде испорачан на земја каде би бил изложен на тортура или да биде соочен со смртна казна, изјави Морено во видео објавено на Твитер.
-Британската Влада го потврди тоа писмено, согласно нивните одредби, истакна Морено.
Викиликс на Твитер објасни дека Еквадор нелегално дејствувал при укинувањето на политичкиот азил на Асанж „и го прекршил меѓународното право“.
Министерот за надворешни работи на Велика Британија Алан Данкан, рече дека апсењето следувало по „обемен дијалог“ меѓу Велика Британија и Еквадор.
Асанж (47) одби да ја напушти Амбасадата, тврдејќи дека ќе биде екстрадиран во САД за сослушување во врска со активностите на Викиликс. Во 2010 година, САД издадоа потерница по него под обвинение за објавување доверливи информации, по што Асанж замина во Шведска, каде побара азил. Меѓутоа, набрзо во Шведска беше обвинет за силување, но Обвинителството се откажа во 2017 година.
Но, Швеѓанката која го обвинува основачот на Викиликс за силување, ќе побара повторно отворање на тој случај пред шведското правосудство.
Адвокатката Елисабет Маси Фриц изјави дека нејзината клиентка го чекала апсењето на Асанж и на тоа се надевала уште од 2012 година. Адвокатката вели дека ќе направи сè за повторно отворање на случајот со цел Асанж да се испорача на таа земја за да му се суди за силување.
Сноуден: Ова е мрачен момент за слободата на печатот
Поранешниот американски разузнувач и „свиркач“ Едвард Сноуден оцени дека апсењето на Асанж претставува „мрачен момент за слободата на печатот“ .
-Фотографиите од еквадорскиот амбасадор кој ја повика британската тајна полиција во Амбасадата за д аго извлече од зградата издавачот, дали тоа ви се допаѓало или не, наградуван за новинарство – ќе заврши во учебниците по историја. Критичарите на Асанж може да се радуваат, но ова е мрачен момент за слободата на печатот, напиша Сноуден на Твитер, кој е во азил во Русија од 2017 година.
Тој потсети дека Обединетите нации соопштиле дека неговото апсење би претставувало кршење на човековите права и побараа да му се овозможи да се брани од слобода.




