Идната сабота, во Скопје ќе се одржи првата Парада на гордоста. Маршот ќе започне на пладне од паркот Жена Борец, а ќе заврши во грaдскиот парк. Од МВР информираат дека ќе ги превземат сите потребни мерки Парадата да помине без насилство.
„Каков било обид за насилство ќе биде најстрого санкциониран“ рече портпаролот на МВР Тони Ангеловски на прес-конференција на Организацискиот одбор на првата Парада на гордоста.
Тој појасни дека МВР пред секој ваков или сличен настан прави план сразмерно на проценките колку луѓе се очекува да бидат присутни на протестот и какви се опасностите, и врз основа на тоа одлучува колку полицајци ќе бидат ангажирани.
Кочо Андоновски од ЛГБТИ центарот за поддршка при Хелсиншки комитет за човекови права рече дека се задоволни од соработката со МВР, и е уверен е дека овој настан ќе биде безбеден.
Тој очекува дека на настанот да учествуваат од 200 до 500 луѓе.
Секој учесник на парадата ќе добие алка што ќе му биде гаранција дека присуствува. Со алката секој учесник ќе може слободно да се движи во и надвор од одбележаниот простор. Во градскиот парк, односно кај Школка програмата ќе ја водат дрег кралиците Линда Социјалиста и Каја Мор. Покрај предвидените обраќања, ќе има и музичка програма во која ќе учествуваат Тамара Тодевска, Принцез Донатсу и диџеите Ивана Драгшиќ, Зоки Бејбе, Ири Скреч, Ана Мало и Узун Баба, рече Јована Јовановска од ЛГБТИ центарот.