„Убаво е да дојде. Нека дојде, треба помош во државата. Помош е и кога ќе си ја реализирате казната“, рече премиерот Зоран Заев од Битола на коментарот на Груевски на Фејсбук кој се нуди да и помогне на Владата поради состојбите во државата.
„Сите испраќаме порака на одговорност со се, заради тоа можам да испратам навистина недвосмислена порака – нека се врати дома“, рече Заев.
Премиерот ја коментираше и средбата на лидерот на ВМРО-ДПМНЕ, Христијан Мицкоски, и унгарскиот претседател Викотор Орбан. Тој рече дека тоа било „средба на лидери на политички партии од десницата која може да приденесе за зацврстување на македонско-унгарското пријателство“
Прашан дали Владата дала поддршка на Меѓународниот сојуз кога Бојан Јовановска остварил средба со него во 2017 година, Заев рече дека се сеќава на средбата на која му кажале кои се условите за изградба на старски домови. Тој рече дека Владата е отворена за сите, но се случувало некои да ги злоупотребат или употребат тие средби.
„Владата е отворена за сите, ние симболично ги тргнавме и оградите. Секој граѓанин се прима во Владата дел од мене лично, дел од мојот кабинет, советниците, министрите зашто секоја идеја сакаме да ја преточиме во реализација. Јас се сеќавам на состанокот кој беше за отворање простор за реализација на старски домови. Нормално како сите граѓани така и господинот Бојан Јовановски беше упатен на постапките согласно закон, тоа значи да се обезбеди локација во општините, да се аплицира со проекти, да се добијат одобренија за градба, Министерството за труд и социјални политика кога дава одобрение за старски дом, кои се стандардите што треба да се исполнат. Му беа кажани условите што треба да се исполнат. Владата секојдневно прима луѓе, не е првпат да излегле случаи тоа да се злоупотреби, употреби и сличен начин. Но за тоа постојат истрагите кои треба да ги утврдат сите докази, аргументи, секој што се огрешил пред законот да си одговара“, рече Заев.