Љубиша Арсиќ
Со конфронтирање на обвинителката во предметот „Рекет“, Вилма Русковска и обвинетите Бојан Јовановски и Катица Јанева започна судскиот процес. На моменти некои зборови прозвучуваа и како навреда, но секој сака со што посочни зборови да нападне, односно да се одбрани. Дефанзивна улога имаше Зоран Милевски Кичеец, кој свесен за последиците прифати вина и нему утре ќе му биде изречена пресуда. Колку неговото признание ќе им ја намали шансата на Јовановски и Јанева да се одбранат, особено заради фактот дека тие двајцата се изјаснија како невини. Сите наводи на Јавното обвинителство биле неточни.
При презентирањето на обвинителниот акт Русковска истакна дека Јанева од алчност му доверувала на Јовановски ексклузивни информации кои не смеела да ги пренесува.
„Имаше еден филм „Чарлиеви ангели“ и една госпоѓа која влезе во филм на една естрадна ѕвезда Бојан Јовановски и мислеше дека никој ништо не ѝ може. Може ќе слушнете дека тоа што го направи Катица Јанева е поради наивност или осаменост, но обвинителството има несоборливи докази дека од алчност ја предаде довербата на народот, дека свесно и со умисла ѝ изнесувала детали од истрагата на самопрогласената естрадна ѕвезда Боки Јовановски, што е спротивно на ЗКП“ – образложуваше Русковска во воведниот говор на рочиштето за „Рекет“. Според неа Боки 13, преку Кичеец стапил во контакт со Ана Камчева, сопругата на Орце.
Потоа следуваа лутите реакции на прозваните. Јанева ги тешеше судиите да не се плашат од СМС заканите на Русковска и да судат достоинствено.
„Горда сум на формирањето на СЈО, на тимот кој го предводев четири години, на сите обвинители и истражители. Ја имав честа да формирам тим на обвинители и истражители. Секојпат сум била општествено одговорна“, се преставуваше Јанева пред судот како врвна професионалка. Не пропушти да истакне колку имала сработено, па наведе дека за четири години во СЈО оформиле 171 предмет и сите во различна фаза се предадени на Јавното обвинителство. Очекува тие да имаат завршница и визионерски заврши дека се што направила во СЈО ќе биде пример за следните генерации.
Претходно, воведни зборови имаше и првообвинетиот Бојан Јовановски за кого предметот „Рекет“ се користи за да се водат валкани политички игри врз негов грб.
„Обвинителството ми го сатанизираше името, ме доведоа до линч и набрзо ми го затворија медиумот „1 ТВ“- зборуваше Јовановски, со видно загрижувачка здравствена состојба. Токму здравјето беше причина тој да задоцни 45 минути од притворот во Шутка. Исто како и претходно, и тој, и неговиот адвокат се пожалија дека не му се дава соодветна терапија. Потоа го прегледа лекар што беше присутен во судот и заклучи дека тој може да го следи процесот. Затоа и немаше одложување, иако Јовановски тврдеше дека за да учествува поангажирано во процесот дека му треба подобро здравје.
Боки 13 е обвинет за кривично дело „Примање награда за противзаконито влијание“ и за „Перење пари и други приноси од казниво дело“. Јанева е обвинета за „Злоупотреба на службената положба и овластување“, а Милевски за „Примање награда за противзаконито влијание“.
На следното судење се очекува да сведочи Орце Камчев, бизнисменот кој е длабоко вмешан во целата приказна и сигурно има информации интересни за судот и за јавноста. Но за тоа повеќе ќе се знае во петок. По завршување на рочиштето, Русковска призна дека очекувала признание на вина и од другите обвинети, наспроти адвокатите кои одново ги оспорија доказите на ЈО и повикаа доколку надлежните имаат докази дека Јанева примила пари да се изнесат од кого ги примила, кога и во колкав износ.
Првото соочување во судница остави впечаток дека ќе има силни правни аргументирања и конфронтирања на двете страни во понатамошниот тек од процесот, во надеж дека сите ќе бидат конструктивни, како што и ги замоли судијката Николовска – Масевска.