Папата Франциск го симна превелот на тајност во Ватикан за сексуална злоупотреба, па Католичката црква во иднина ќе може да споделува информации и документи со граѓанските власти, а жртвите ќе имаат прилика да ги ажурираат своите статуси во случаите. Тоа веќе е случај во некои земји, како САД на пример, но таквата пракса досега не важеше секаде. Дел, пак, од Католичките цркви во светот повикаа на т.н. „папска тајна“ што се однесува на одбивање на соработка за некои од случаите.
„Папската тајна“ се смета за највисоко ниво на доверливост во црковниот Закон што опфаќа голем број на административни случаи во Ватикан, како номинации на кардинали, истраги од Секретаријатот на државата и за верска доктина од Собранието. Нејзиното прекршување досега значеше прекин на комуникацијата со Црквата.
„Папската тајна повеќе не е изговор“, порача главниот истражител за сексуална злоупотреба на Ватикан, Архиепископот Чарлс Скиклуна.
Укинувањето на правилото за тајност доаѓа по изнесените критики на неколку црковни службеници за време на историскиот Самит во февруари во Ватикан со фокус на борбата против сексуалната злоупотреба на свештенството. Дел од учесниците го застапуваа ставот дека тајноста во случаите на сексуална злоупотреба е застарена работа и истата служи само за криење на црковни службеници наместо соработка со граѓанските власти.
За Скиклуна, укинување на правилото „значи дека прашањето за транспарентност во иднина ќе се спроведува на највиско ниво“. Укинувањето на тајната, пак, за жртвите ќе значи информираност за текот и исходот на нивните случаи во Ватикан.
Специјалната декларација на Папата е наречена Респис и стапува на сила веднаш. Притоа не ги менува правилата на приватност околу известувањата за сексуална злоупотреба или судења во Ватикан за наводни насилници. Еден од водечките лидери во кампањата, за „Си-Ен-Ен“, изјави дека потегот на Папата за укинување на клучни закони за тајност во Црквата е „застарен“ и неопходни се натамошни чекори во движењето кон транспарентност.
„Претставници на жртвите од целиот свет со години бараат укинување на папската тајна во случаи за сексуална злоупотреба на деца од свештениците“, вели Матијас Кач.
Кач, кој и самиот е жртва на злоупотреба, е основач на групацијата за кампањи „Ending Clering Abuse“.
„Кон крајот на февруари во Ватикан, на маргините на кризниот Самит за злоупотреба, меѓународната мрежа на жртви и активисти го поставија ова барање. Затоа одлуката на Ватикан е заостанат чекор. Сега е важно да се преземат натамошни чекори кон транспарентност во однос на илјадниците случаи на злоупотреба во коморите и палатите во Ватикан. Тие досиеја мора да бидат достапни за независно разгледување и истрага“, додава Кач.
Папата Франциск воедно ја зголеми и старосната граница на возраста во црковната дефиниција за детска порнографија од 14 на 18 години. Новите ватикански закони што ќе стапат во сила во јануари во 2020 година ќе значат дека поседување на порнографски материјал со деца под 18 години е кривично дело.