Наредната недела преговарачките тимови на СДСМ и на ВМРО-ДПМНЕ ќе имаат средба на која ќе се обидат да ги надминат недоразбирањата околу новиот закон за јавно обвинителство, откако еврокомесарот за проширување Оливер Вархеји порача дека тоа треба да биде реформски приоритет кој треба да го реализира овој паралемнтарен состав пред изборите на 12 април. Од ВМРО-ДПМНЕ потврдија дека во текот на вчерашниот ден до нив бил доставен нов предлог закон за ЈО, кој на крајот од минатата година беше најавен од Министерството за правда од каде вчера најприн рекоа дека во игра останува старата верзија, но подоцна очигледно нешто се променило.
„Ние како правен тим во текот на следните денови ќе го анализираме и очекуваме идната недела да договориме термин за средба со преговарачкиот тим. Она што можев да го забележам на кратко, повторно се остава еден законски обид за тимот на СЈО да бидат водемни во тимот на Вилма Рускоска која очигледно е замена за Катица Јанева. Според мене, Законот за јавнообвинителска служба и законот за плати на ЈО е јасен, не може ниеден обвинител да добие повеќе од 35% надомест од платата, а во СЈО добивале астроносмки суми. За таков прекршок треба дисциплинска постапка. Овие не треба да бидат повластени или надградени или привилегирани. Од самото основање, институцијата работеше на нетранспарентен начин и најголемиот дел од овие пари се врз основа на договори кои ги држеле како тајни договори без да се има увид во овие средства“, рече Милошоски.
И претседателот на Собранието Талат Џафери апелираше до партиите што побргу да ги приближат ставовитедодека пак шефот на дипломатијата Никола Димитров оцени дека тие што нема да гласаат и нема да учествуваат во таков закон не се чесени и искрени пред гласачите и пред граѓаните кога велат „сакам Европска Унија“.
Вархеји, при посетата во Скопје, изрази надеж дека сегашниот парламентарен состав ќе даде приоритет на новиот закон за ЈО, консатирајќи дека тоа ќе биде добар знак упатен до земјите-членки.
Франсоа Лефон, советник на вицепремиерот за европски прашања, во интервју за МИА, нагласи дека доколку сите политички партии се за членство во ЕУ како што велат, треба да се способни да се договорат околу реформите за да ѝдокажат на Европската комисија дека се посветени на доброто на земјата.
„Инаку, ќе видиме дека ова се само политички игри, и една од причините што не го добивме Законот за СЈО. Опозицијата не сакаше да му даде на мнозинството таков подарок пред изборите. Двотретинско мнозинство не беше можно. Ако партиите се посветени на европскиот пат, ќе сфатат дека овој момент е поважен од нивните политички игри“, рече Лефон.
Димитров, во интервјуто за МИА, нагласи дека сега сме ставени на тест дали ќе може ова да го издигнеме вон изборниот контекст и во тој случај во март, како што рече, „можеби би можеле да прогласиме една заедничка победа и на владејачката партија и на опозицијата, на цел народ, на некој начин и на целото општество или ова ќе го направиме предмет на меѓупартиски препукувања“.
„Ако еврокомесарот, кој очигледно е наш сојузник и работи на таа агенда да го направиме конечно овој пробив во заслужената следна фаза, ако тој вели важно е ова да се донесе во сегашниот парламентарен состав, ќе се види дали сме само декларативни во заложбите и едноставно е – кој нема да гласа и нема да учествува во таков закон, во кој се вградените сите забелешки и сугестии на ЕК, не е чесен и искрен пред гласачите и пред граѓаните кога вели сакам ЕУ, но не сакам да го правам тоа што ЕУ сугерира дека треба да се прави за да се успее“, истакна министерот за надворешни работи. Тој смета дека ако овој закон се постави како приоритет, постојат шанси за договор, иако времето е кратко до 12 февруари.