Околу 32 милиона евра Владата од државната каса пренесе на сметката на Национални енергетски ресурси (НЕР), кој е во сопственост на државата. Тоа се пари со кои НЕР ќе мора да ги откупи акциите на Макпетрол кои компанијата ги има во ГА-МА, за да може ГА-МА да премине во целосна државна сопственост. На еден од јавните настапи, министерката за финансии Нина Ангеловска, истакна дека трансакцијата на парите кон НЕР е практично за откуп на акциите о Макпетрол.
Случајот е застанат на тоа дека парите од Владата се трансферирани кај НЕР, но другите постапки не се завршени. Она што треба да се случи е всушност Макпетрол и Владата да потпишат
Спогодба за вонсудско решавање на деценискиот спор, по што ќе следува продажба. Така барем имаат договорено двете страни. По завршување на медијацијата од страна на Макпетрол и Енергетската заедница, се стигна до спогодбата со која се има за цел конечно, законско и правично регулирање на сопственичките односи во ГА-МА, а во согласност со новиот Закон за енергетика,
како и третиот енергетски пакет кој е инкорпориран во законот.
Но, наспроти ова не се почнати постапките во однос на медијацијата како што било планирано. Макпетрол ги има донесено поединечните акти за потпишување на Спогодбата, а тоа компанијата го има објавено во своето последно соопштение до Берзата.
„Макепетрол и Владата заради конечно и законито регулирање на своите сопственички односи во ГА-МА, во согласност со Законот за енергетика побара медијација во Центарот за решавање спорови на Енергетската заедница. Макпетрол и Владата требаше да донесат и соодветни правни акти за официјално потпишување на Спогодбата. Додека не завршат сите процедури и секоја од страните не го испочитува договорот, продажбата нема да може се реализира“, објави компанијата.
Дали сега техничката Влада ќе има време и капацитет да се позанимава со ова прашање станува неизвесно. Ако се чекаат прво изборите, тогаш ниту до мај нема да се надмине ова прашање, иако случајот налага итност. На потег е Владата. Од таму јавно не пренесуваат директен одговор кога ќе
се реши ова прашање, судејќи по настапите на владини преставници. Неофицијално, Владата знае за итноста и потребата од надминување на спорот, што ако се преточи во пракса би значело што поскоро потпишување на спогодбата, затоа што секое одложување прави штета.