Со задоцнување од еден час, започна собраниската седница на која првично беше планирано да се гласа за законот за јавно обвинителство кое беше прва точка на дневниот ред. Сепак, за законот ке се гласа утре на денот на распуштање на Собранието.
Спикерот, Талат Џафери, премина на втората точка на дневен ред, а тоа се измените на Законот за советот на јавни обвинители.
Претходно пратеникот на СДСМ, Костадин Костадинов, на прес – конференција во Собранието ги повика пратениците од сите пратенички групи, како што рече, да се стават на страната на правната држава со тоа што ќе дадат поддршка за Предлог-законот за јавно обвинителство. Тој не можеше да каже дали власта го има потребното двотретинско мнозинство потребно за донесување на овој закон, ниту кога ќе почне седницата. Само кусо рече дека е отимист оти до чинот на гласање најмалку 80 пратеници ќе го имаат предвид она што е важно и ќе се стават во функција на правото и на правната држава.
„Не можам да кажам кога ќе се гласа, за текот на седницата одговор треба да даде претседателот на Собранието Талат Џафери. Многу неблагодарно е да кажам дека имаме 80 пратеници врзани во крпче, прво е неколегијално од моја страна, но длабоко сум убеден и сум оптимист до чинот на гласањето ќе го имаме потребното мнозинство и дека со сигурност најмалку 80 пратеници колеги, ќе имаат предвид она што е важно и ќе се стават во функција на правото и на правната држава“, рече Костадинов.
Пратеникот на ДУИ, Артан Груби, пак рече дека повеќе не се преговара за дво-третинско мнозинство и дека сите оние кои сакаат, утре ќе гласааат.
Тој додаде дека денеска на дневен ред би требало да ги усвојат законите за Советот на јавни обвинители како и законот за АВМУ и други закони, меѓу кои и законот за одбрана.
Груби е задоволен што се прифатило барањето за израмнување на Изборните единици, со што Маврово и Ростуше целосно се префрлаат во петтата Изборна единица и се исполнува уште една препорака на ОБСЕ и ОДИХР уште од 2014 година.
„ДУИ е задоволна околу измените во ИЗ кои беа прифатени консензуално од сите политички партии. Апсолутно никогаш ИЗ не бил услов за друг Закон, туку беа паралелни процеси со волја и ангажман на сите политички партии“, рече Груби.