Ризиците, но и опасностите од користењето на социјалните мрежи, како и механизмите за реакција кога приватноста е нарушена беше целта на предавањата во неколку скопски училишта, по повод Европскиот ден за заштита на личните податоци.
Според статистиката на Дирекцијата за заштита на личните податоци, Фејсбукот убедливо води во однос на повредите на личните податоци.
Две третини од сите повреди на приватноста регистрирани во 2012 година се на социјалните мрежи, како Фејсбук, Твитер и други социјални медиуми со кои граѓаните комуницираат во земјата и надвор од неа.
Злоупотребите, според директорот на Дирекцијата, Ѓеорѓиевски, најчесто се вршат преку хакирање на профили и изнесување на содржини од лица кои што со недобронамерни изјави придонесуваат за повреда на приватноста.
Дирекцијата по приемот на ваквите барања за заштита на приватноста, со поддршка на јавните мрежи ги брише профилите кои се пробиени, односно хакирани, или пак поведува соодветна иницијатива за кривична постапка, со оглед дека заштитата на личните податоци е казниво дело според Кривичниот законик.
Според добиените претставки од граѓаните, освен на социјалните мрежи, не се издвојува некое особено подрачје во кое предничи оваа појава.