„Нема сомнение дека Градски стадион б.б. е седиштето на „Метастаза“ б.б. на Никола Груевски и неговата Влада. Слушнавте како власта купува уредници. Еве како Никола Груевски купува цели медиуми“, ја почна денешната прес-конференција Петре Шилегов, портпарол на СДСМ.
– Ова се само 4 уплатници за легнати пари на сметка на телевизија Сител. Во само еден ден. На 23 дена пред локалните избори:
– Датум 01 март 2013. Корисник на буџетски средства: Влада на Р.М. Примач: Телевизија Сител ДООЕЛ Скопје. Уплатени 7 милиони и 11 илјади денари!
– Повторно, 01 март 2013. Корисник на буџетски пари: Влада на Р.М. Примач: Телевизија Сител. 5 милиони 842 илјади 499 денари! Во текот на истиот ден се уплатени уште толку пари на сметката на Сител, 5 милиони 842 илјади 499 денари.
– Повторно, 01 март 2013. Владата и префрла на Сител 2 милиона 75 илјади 625 денари.
Повторно, 01 март 2013. Владата на РМ на Сител и пушта уште 1 милион и 230 илјади денари.
„Тоа е вкупна сума од 22 милиони денари! Тоа се 360 илјади евра пари од Буџетот, испратени од Илинденска б.б. на адреса на Градски стадион б.б. Во само еден ден! На 4 различни уплатници, на само 23 дена пред локалните избори! Само за еден ден 360 илјади евра за Сител. Цел на дознака: реализација на кампања“, истакна Шилегов.
Кој ги постави следниве прашања: Каква кампања исплаќа Владата? На 1 март? 23 дена пред избори? Дали Владата плаќа за ВМРО-ДПМНЕ со пари од граѓаните?
– Ако само за еден ден Сител добива 360 илјади евра, колку пари месечно Владата и дава на Телевизија Сител за реклами против опозицијата премиере Никола Груевски?
Вака ли ги плаќате негативните кампањи против раководствата на СДСМ?
– Колку исплативте или ќе платите на вашите одработувачи за засилената валкана кампања деновиве против раководството на СДСМ, откако СДСМ ги отвори вашите заеднички милионски тендерски зделки?
– Колку тоа вкупно ги чини граѓаните на Македонија и уште колку медиуми и мегафони храните со државни пари господине Никола Груевски?