Просечната месечна нето-плата исплатена по вработен во март оваа година изнесувала 26.422 денари што е зголемување за 7,4 отсто во однос на истиот месец лани. Бруто платата, пак, била 39.437 денари што е раст од 8,1 отсто, соопшти Државниот завод за статистика.
Зголемувањето на нето платата се должи, пред сè, на зголемувањето на просечната месечна исплатена нето-плата по вработен во секторите образование (12,2 отсто), трговија на големо и трговија на мало; поправка на моторни возила и мотоцикли (11,2 отсто) и преработувачка индустрија (9,8 отсто).
Намалување на просечната месечна нето-плата исплатена во однос на претходниот месец е забележано во секторите објекти за сместување и сервисни дејности со храна (15,6 отсто), уметност, забава и рекреација (15,4 отсто) и стручни, научни и технички дејности (9,9 отсто).
Зголемувањето на бруто платата, според статистика, се должи, пред сè, на зголемувањето на просечната месечна бруто-плата исплатена по вработен во секторите образование (13,3 отсто), трговија на големо и трговија на мало; поправка на моторни возила и мотоцикли (11,5 отсто) и Преработувачка индустрија (10,6 отсто).
Намалување на просечната месечна бруто-плата исплатена по вработен во однос на претходниот месец е забележано во секторите објекти за сместување и сервисни дејности со храна (15,9 отсто), уметност, забава и рекреација (15,5 отсто) и стручни, научни и технички дејности (8,7 отсто).