Штипска текстилна конфекција во која се детектирани шест работнички со ковид-19 ќе оди под клуч на најмалку една недела, но и подолго ако за такво нешто се покаже потреба. Одлуката ја донел сопственикот за што ги информирал градоначалникот Благој Бочварски и општинскиот кризен штаб.
„Разговарав со сопственикот на конфекцијата, но и со сите инспекциски служби и ме информираа дека таму е извршен инспекциски увид, надзор и контрола и констатирано е дека не се прекршени мерките за носење на заштитна опрема. Но, сопственикот ме информира дека на негова иницијатива ќе ја затвори компанијата на недела дена, а ако има потреба и повеќе, со цел да се испитаат сите вработени“, вели Бочварски.
Надлежните од Центарот за јавно здравје-Штип информираа дека денеска се земени девет брисеви од кои седум се поврзани со конфекцијата. Во тек е епидемиолошка анкета и за работнички од други конфекции, кои се превезувале во ист автобус со работничките од оваа штипска конфекција. Првично станува збор за повеќе од десет лица.
Ирина Бухова, директор на Државниот здравствен и санитарен инспекторат (ДЗСИ), вели дека сите контакти на досега утврдените позитивни случаи ќе бидат ставени во изолација, но најавуваат надзор и на автобусите на другите конфекции.
„Во однос на превозните средства, ДСЗИ ќе изврши надзор во однос на хигиената во нив, обезбедени средства за дезинфекција на раце на лицата кои се превезуваат и динамика на дезинфекција на превозните средства“, вели Бухова.
Кристина Ампева од НВО „Гласен текстилец“, како најгласна организација за правата на текстилните работнички, препорачува во фабриките да се користи годишниот одмор за да се спречи состојбата да излезе од контрола. Вчера со препорака излезе и Центарот за јавно здравје во Штип за оддржување на дистанца, за носење на заштина опрема и за редовна дезинфекција на автобусите и сите работни површини.